بەپێی ڕاپۆرتە گەیشتووەکان بە ڕێکخراوی مافی مرۆڤی هانا، ڕۆژی چوارشەممە ٩ی بانەمەڕی ١٤٠٥ی هەتاوی (٢٩ی ئاوریلی ٢٠٢٦)، کرێکارێک بە ناوی “لەتیف محەممەدزادە”، خەڵکی شاری سەقز، خێزاندار و باوکی دوو منداڵ، لە کاتی کارکردن لە پڕۆژەی ڕووخاندنی بینایەک لە شاری بۆکان، بەهۆی کەوتنەخوارەوە لە بەرزایی تووشی ڕووداو بوو و گیانی لەدەست دا.
بە گوتەی سەرچاوەیەکی ئاگادار، ئەم کرێکارە کە بە شێوەی “ڕۆژانە” کاری دەکرد، بۆ پەیداکردنی بژێوی ژیان چووبووە شاری بۆکان. ناوبراو لە کاتی کارکردندا بەهۆی نەبوونی کەرەستە و پێداویستییەکانی ئیمەنی و پاراستنی کار، لە بەرزایی کەوتووەتە خوارەوە و بە سەختی بریندار بووە.
ئەم سەرچاوەیە لە درێژەدا گوتی: لەتیف محەممەدزادە دوای گواستنەوەی بۆ نەخۆشخانە، بەهۆی قورسیی برینەکانیەوە گیانی لەدەست داوە.
شایانی باسە لە ساڵانی ڕابردوودا، بەهۆی نەبوونی ئیمەنیی ژینگەی کار و کەمتەرخەمیی خاوەنکارەکان بەرانبەر بە بنەماکانی پاراستن و سەلامەتی، ئاماری ڕووداوەکانی کار لە کوردستان و ناوچەکانی دیکەی ئێران ڕووی لە زیادبوون کردووە.
بەپێی کۆنڤانسیۆنەکان و پێوەرە نێودەوڵەتییەکانی مافی مرۆڤ و مافی کار، حکوومەتەکان ئەرکدارن بەوەی کە تەندروستی و سەلامەتیی ژینگەی کار بۆ کرێکاران دابین بکەن.
گیانلەدەستدانی کرێکارێکی خەڵکی سەقز بەهۆی کەوتنەخوارەوە لە به رزایی بینایەک لە شاری بۆکان
