ڕێکخراوی مافی مرۆڤی هانا ڕادەگەیەنێت کە بەدوای ڕووماڵکردنی بەربڵاوی مانگرتنی ڕۆژی ڕابردوو لە شارەکانی کوردستان، ژمارەیەک لە بنەماڵەی ئەندامانی ئەم ڕێکخراوە لە ئێران لەلایەن ناوەندە ئەمنییەکانەوە بانگ کراون و بەهۆی چالاکییە مافی مرۆڤیەکانی کەسوکاریانەوە کهوتوونهته بەر هەڕەشە و گوشار.
هانا ئەم کردەوانە بە توندی مەحکووم دەکات و پێداگری دەکات کە بانگ کردن، هەڕەشە و خستنەژێر گوشاری ئەندامانی بنەماڵەکان بە مەبەستی کاریگەریدانان لەسەر چالاکییە مافی مرۆڤییەکانی کەسوکاریان، نموونەیەکی بەرچاوی هەڕەشە و کردەوەیەکی تۆڵەسێنەرانەیە بەرامبەر چالاکوانانی مافی مرۆڤ. بەرپرسیار دانانی کەسەکان بەهۆی چالاکی یان هەڵوێستی کەسوکاریان، هیچ پاساوێکی یاسایی نییە و پێچەوانەی سەرەتاییترین بنەماکانی بەرپرسیارێتیی تاکەکەسی و پێوەرە بنەڕەتییەکانی مافی مرۆڤە.
داکۆکیی ئاشتییانە لە مافی مرۆڤ، بەڵگەدارکردنی پێشێلکارییەکانی مافی مرۆڤ و بڵاوکردنەوەی زانیاری دەربارەیان، لەو چالاکییە ڕەوایانەن کە لەلایەن یاسا و ڕێساکانی نێودەوڵەتییەوە پارێزراون و ناتوانن لە خۆیاندا ببنە بنەمای یاسایی بۆ بانگهێشتکردن، هەڕەشە، بەدواداچوون یان خستنەژێر گوشاری چالاکوانانی مافی مرۆڤ و ئەندامانی بنەماڵەیان.
هانا پێداگری دەکات کە سەپاندنی گوشار بۆ سەر بنەماڵەی ئەندامانی ئەم ڕێکخراوە، نە شەرعییەتی یاسایی هەیە و نە دەتوانێت ببێتە ڕێگر لە بەردەم بەردەوامیی چالاکییە سەربەخۆکانی هانا لە بەڵگەدارکردن، ئاگادارکردنەوە و داکۆکیکردن لە مافی مرۆڤ.