ڕێکخراوی مافی مرۆڤی هانا، دەستبەسەرکردنی چوار هاووڵاتی لە پارێزگای کوردستان لەلایەن هێزە ئۆپەراسیۆنییەکانی قەرارگای حەمزەی سەیدولشوهەدا لە ڕێکەوتی ٧ی بانەمەڕی ١٤٠٥ (٢٦ی ئاوریلی ٢٠٢٦) و شێوازی زانیاری گەیاندنی ئەمنی سەبارەت بەم دۆسیەیە بە توندی شەرمەزار دەکات.
بەپێی ڕاپۆرتی میدیاکانی سەر بە سوپای پاسدارانی کۆماری ئیسلامی، ئەم کەسانە بە تۆمەتی پەیوەندی لەگەڵ گرووپە نەیارەکان و بە بانگەشەی هەوڵدان بۆ ئەنجامدانی ئۆپەراسیۆنی تیرۆریستی دەستبەسەر کراون. میدیا ئەمنییەکان هەروەها بانگەشەی ئەوە دەکەن کە چەک، تەقەمەنی و کەرەستەی پەیوەندیکردن، لەوانە سیستەمی ئینتەرنێتی مانگی دەستکردی “ستارلینک”یان لە لای ئەو کەسانە دۆزیوەتەوە. ڕێکخراوی هانا جەخت دەکاتەوە کە ئەم بانگەشانە تەنیا لەلایەن ناوەندە ئەمنییەکانەوە خراونەتە ڕوو و بەهۆی نەبوونی دەستڕەسی بە سەرچاوە سەربەخۆکان، ئەگەری ڕاستی و دروستیی تۆمەتەکان، شێوازی دەستبەسەرکردن و وردەکارییەکانی دۆسیەکە لە ئارادا نییە.
هانا بەکارهێنانی ئەدەبیاتی تۆمەتبارکردن و تیرۆریستی لەلایەن ناوەندە ئەمنییەکانی کۆماری ئیسلامی پێش تێپەڕبوونی قۆناغە دادوەرییە سەربەخۆکان، بە پێشێلکردنی ئەسڵی بێتاوانی و زەمینەسازی بۆ دۆسیەسازی، گوشاری ئەمنی و بێبەشکردنی دەستبەسەرکراوان لە مافە بنەڕەتییەکانیان دەزانێت. ئەم نیگەرانییە بەتایبەت لە شارەکانی کوردستان، بەهۆی مێژووی دەستبەسەرکردنە ئەمنییەکان، بێبەشکردن لە پارێزەر، وەرگرتنی دانپێدانانی زۆرەملێ و دەرکردنی سزای قورس، جددیترە.
نەبوونی شەفافیەت سەبارەت بە ناسنامەی دەستبەسەرکراوان، شوێنی ڕاگرتن، بارودۆخی تەندروستی و دەستڕانەگەیشتنیان بە بنەماڵە و پارێزەری دڵخواز، مەترسیی دەستبەسەرکردنی سەرەڕۆیانە، بێسەروشوێنکردنی کورتخایەن، ئەشکەنجە یان هەر جۆرە هەڵسوکەوتێکی نەشیاو زیاد دەکات. بارودۆخێکی لەو شێوەیە لەگەڵ ماددەی ٩ی جاڕنامەی جیهانیی مافی مرۆڤ و گەرەنتییەکانی دادگاییکردنی دادپەروەرانە لە ماددەی ١٤ی پەیماننامەی نێودەوڵەتیی مافە مەدەنی و سیاسییەکاندا دژبەیەکە.
ڕێکخراوی مافی مرۆڤی هانا وێڕای شەرمەزارکردنی دەستبەسەرکردنە ئەمنییە ناڕوونەکان، شاردنەوەی زانیارییەکان لەلایەن دامەزراوەکانی کۆماری ئیسلامی و میدیایی کردنەوەی تۆمەتە نەسەلمێندراوەکان، داوای ڕاگەیاندنی دەستبەجێی ناسنامە، شوێنی ڕاگرتن، بارودۆخی تەندروستی و تۆمەتە وردەکانی ئەم کەسانە دەکات. هانا هەروەها داوا دەکات دەستبەجێ دەستڕەسییان بۆ بنەماڵە و پارێزەری دڵخواز هەبێت، چاودێریی سەربەخۆ بخرێتە سەر دۆخی دەستبەسەرکراوان و کۆتایی بە بەکارهێنانی ناسناوە ئەمنییەکان بهێنرێت پێش پێڕاگەیشتنی دادوەریی دادپەروەرانە و ئاشکرا.