ڕێکخراوی مافی مرۆڤی هانا نیگەرانیی قووڵی خۆی نیشان دەدات بەرامبەر بە بەردەوامیی دەستبەسەرکردن و بێدەنگبوونی بارودۆخی شلێر مامقادری، هاووڵاتیی خەڵکی مەهاباد، دوای تێپەڕبوونی ۱۸ ڕۆژ لە کاتی دەستگیرکردنی.
بەپێی ئەو ڕاپۆرتانەی گەیشتوونەتە هانا، شلێر مامقادری کە دایکی دوو منداڵە، ڕۆژی چوارشەممە ۱۹ی خاکەلێوەی ۱۴۰۵، لەلایەن هێزەکانی ئیدارەی ئیتلاعات لە مەهاباد دەستبەسەر کراوە و بۆ شوێنێکی نادیار گواستراوەتەوە. تا ئێستا هیچ زانیارییەکی ورد سەبارەت بە شوێنی ڕاگرتن، بارودۆخی جەستەیی، دەستڕاگەیشتن بە بنەماڵە و پارێزەر، یان پرۆسەی دادوەریی دۆسیەکەی لەبەردەستدا نییە.
بەپێی زانیارییەکانی هانا، هۆکاری دەستبەسەرکردنی خانم مامقادری بۆ پەیوەندییەکانی لەگەڵ بنەماڵەی گیانبەختکردووانی خۆپێشاندانەکان لە شاری مەهاباد گەڕێندراوەتەوە. ئەگەر ئەم بابەتە ڕاست بێت، دەستبەسەرکردنی ناوبراو دەتوانێت وەک نموونەیەک لە هەڵسوکەوتی ئەمنیی لەگەڵ پەیوەندییە مەدەنی و خێزانییەکانی خێزانە دادخوازەکان هەژمار بکرێت.
شلێر مامقادری لە کاتێکدا دەستبەسەر کراوە کە بەدەست نەخۆشیی شێرپەنجەوە دەیناڵاند و لەژێر چارەسەری پزیشکی و بەکارهێنانی دەرماندابوو. سەرچاوەیەکی ئاگادار بە هانای ڕاگەیاندووە کە دەستگیرکردنی ناوبراو بە توندوتیژییەوە بووە و لە کاتی دەستبەسەرکردنیدا ئەژنۆی شکاوە. سەرەڕای ئەم بارودۆخە، تا ئێستا هیچ زانیارییەک سەبارەت بە دەستڕاگەیشتنی بە دەرمان، پشکنینی پزیشکی، چارەسەری پسپۆڕانە یان چاودێریی بەردەوام بڵاو نەکراوەتەوە.
لە ڕوانگەی یاساکانی ناوخۆی ئێرانەوە، ئەم دۆخە لەگەڵ بنەماکانی یاسای ئایینی دادڕەسی سزادان ناگونجێت. بەپێی ماددەی ۴۹، هێزە ئەمنییەکان ئەرکدارن دەستبەجێ دەستبەسەرکردن و هۆکارەکەی بە داواکاری گشتی ڕابگەیەنن؛ بەپێی ماددەی ۵۰، کەسی دەستبەسەرکراو مافی ئەوەی هەیە بنەماڵەکەی ئاگادار بکاتەوە؛ و بەپێی ماددەی ۵۱، دەستبەسەرکراو یان خزمە نزیکەکانی دەتوانن داوای پشکنینی پزیشکی بکەن و ئەنجامەکەی دەبێت لە دۆسیەکەدا تۆمار بکرێت. لە دۆسیەی شلێر مامقادریدا، بەردەوامیی بێدەنگبوون لە چارەنووسی، بڵاونەکردنەوەی شوێنی ڕاگرتنی و بێبەشکردنی لە چارەسەر، بەتایبەت بە لەبەرچاوگرتنی نەخۆشیی شێرپەنجە و شکانی ئەژنۆی، پێچەوانەی ئەم یاسایانەیە.
هەروەها، بەپێی ماددەی ۱۰ی میساقی نێودەوڵەتی مافە مەدەنی و سیاسییەکان، ئێران ئەرکدارە بە ڕێزگرتن لە کەرامەتی مرۆیی هەڵسوکەوت لەگەڵ هەموو ئەو کەسانەدا بکات کە ئازادییان لێ زەوت کراوە. دەستنەگەیشتنی کاریگەر بە چارەسەر، بێدەنگیی درێژخایەن و وەڵامنەدانەوەی بانگەشەی پێکانە جەستەییەکان، دەتوانێت پێشێلکردنی ئەم بەڵێنانە بێت.
ڕێکخراوی مافی مرۆڤی هانا داوا دەکات دەستبەجێ شوێنی ڕاگرتنی شلێر مامقادری ئاشکرا بکرێت، ڕێگەی پێ بدرێت پەیوەندی بە بنەماڵە و پارێزەرەوە بکات، پشکنینی پزیشکی سەربەخۆی بۆ بکرێت، دەرمان و چارەسەری پێویستی بۆ دابین بکرێت و بنەمای یاسایی دەستبەسەرکردنی ڕوون بکرێتەوە. هانا جەخت دەکاتەوە کە بەرپرسیارێتی هەر جۆرە خراپتربوونی بارودۆخی جەستەیی، زیانی قەرەبوونەکراوە یان هەر جۆرە مەترسییەک بۆ سەر تەندروستی و ئاسایشی ئەم هاووڵاتییە، لە ئەستۆی لایەنی دەستبەسەرکەر، بەرپرسی دادوەریی دۆسیەکە و ئیدارەی گشتیی ئیتلاعاتی پارێزگای ورمێ دایە
ڕاپۆرتی هانا سەبارەت بە بەردەوامیی دەستبەسەرکردن و بێ ئاگایی لە چارەنووسی “شلێر مامقادری” پاش ١٨ ڕۆژ
