بەپێی ئەو ڕاپۆرتانەی گەیشتوونەتە ڕێکخراوی مافی مرۆڤی هانا: «پێشەوا ئاقاپوور»، تەمەن ٢٢ ساڵ و خەڵکی شارستانی بۆکان، یەکێک لە دەستبەسەرکراوانی خۆپێشاندانەکانی «ژن، ژیان، ئازادی»، دوای نزیکەی دوو مانگ لە دەستبەسەرکردنی، بە شێوەیەکی کتوپڕ لە بەندیخانەی ناوەندیی ورمێوە بۆ دەستبەسەرگەی ئیدارەی ئیتڵاعاتی ئەو شارە گواستراوەتەوە.
پێشەوا ئاقاپوور ڕۆژی پێنجشەممە ١٤ی ڕەشەمەی ١٤٠٤، لە کاتی هێرشی هێزە ئەمنییەکان بۆ سەر ماڵی باوکی لە بۆکان، هاوڕێ لەگەڵ لێدان و سووکایەتی پێکردن دەستبەسەر کراوە.
هەروەها باوکی ئەم هاوڵاتییە بەهۆی ئەو لێدانانەی لەلایەن هێزە ئەمنییەکانەوە بەریکەوتووە، پەراسووی شکاوە. بەپێی زانیارییەکان، ئەم هاوڵاتییە چەند ڕۆژ پێش ئێستا لە بەندیخانەی ناوەندیی ورمێوە بۆ دەستبەسەرگەی ئیدارەی ئیتڵاعات گواستراوەتەوە و لە ماوەی دەستبەسەرکردنیدا تەنیا یەک پەیوەندییەکی تەلەفۆنیی کورتی لەگەڵ خێزانەکەیدا هەبووە.
شایانی باسە کە پێشەوا ئاقاپوور پێشتریش لە ڕێکەوتی ١٤ی خەزەڵوەری ١٤٠١، لە کاتی خۆپێشاندانە سەرتاسەرییەکاندا، دوای بانگکرانی بۆ ئیدارەی ئیتڵاعاتی بۆکان دەستبەسەر کرابوو و خرابووە ژێر ئەشکەنجەوە.