بە پێی هەواڵی گەیشتوو بە رێکخراوی مافی مرۆڤی هانا، ڕۆژی یەکشەممە ٤ی گەلاوێژی ١٤٠٥، شارۆمەندێک بە ناوی عەبدوڵڵا پەشابادی، خەڵکی ئاوایی “پەشاوا”ی سەر بە شاری کامێران و دانیشتوویی شاری کرماشان، لە لایەن هێزە ئەمنییەکانەوە دەستبەسەر و بۆ شوێنێکی نادیار ڕاگوێزراوە.
بە گوێرەی زانیارییەکانی هانا، هێزە ئەمنییەکان بە هەڵکوتانە سەر ماڵەکەی و بە شێوەی سەرەڕۆیانە ئەم شارۆمەندەیان دەستبەسەر کردووە.
شایانی باسە، تا ساتی بڵاو بوونەوەی ئەم ڕاپۆرتە هیچ جۆرە زانیارییەک لە سەر هۆکاری دەستبەسەرکردن و ئەو تۆمەتانەی دراونەتە پاڵ ئەم شارۆمەندە کوردە، لە بەردەستدا نیە.