بەپێی ئەو زانیارییانەی بە ڕێکخراوی مافی مرۆڤی هانا گەیشتوون، جەلال خودامورادی، تەمەن ٤٦ ساڵ، و موحسین حوسێنپەناهی، تەمەن ٣٧ ساڵ، دوو کاسبکاری خەڵکی سنە، ڕۆژی دووشەممە ٢٣ی خەرمانانی ١٤٠٥ی هەتاوی، دوای سەردانیان بۆ ئیدارەی ئەماکنی ئەم شارە، لەلایەن هێزەکانی ئیدارەی ئیتلاعاتەوە دەستبەسەر کران و بۆ شوێنێکی نادیار گواسترانەوە.
لەسەر بنەمای زانیارییە گەیشتووەکان بۆ هانا، پێش دەستبەسەرکردنیان پەیوەندیی تەلەفۆنییان پێوە کراوە و داوایان لێ کراوە بۆ پێشکەشکردنی بەڵێننامەی نووسراو سەردانی ئیدارەی ئەماکن بکەن. ناوەڕۆکی ئەم بەڵێننامەیە، خۆپاراستن لە داخستنی شوێنی کاسبی و بەشدارینەکردن لە مانگرتنی گشتیی ڕۆژی ٢٥ی خەرمانان ڕاگەیەندراوە.
دەستبەسەرکردنی ئەم دوو هاووڵاتییە لە سەروبەندی بانگەوازی هاوپەیمانیی حیزبەکانی کوردستانی ئێران بۆ مانگرتنی گشتیی کاسبکاران و بازاڕییان لە ڕۆژی چوارشەممە ٢٥ی خەرمانان، هاوکات لەگەڵ ساڵیادی ژینا ئەمینی، ئەنجام دراوە. لە ماوەی ڕۆژانی ڕابردوودا، هانا چەندین ڕاپۆرتی لەسەر سەپاندنی گوشار بۆ سەر کاسبکاران و هەوڵی ناوەندە ئەمنی و ئینتیزامییەکان بۆ ڕێگریکردن لە هاوڕێیەتییان لەگەڵ ئەم مانگرتنە پێ گەیشتووە.
تا کاتی بڵاوکردنەوەی ئەم ڕاپۆرتە، شوێنی ڕاگرتنی جەلال خودامورادی و موحسین حوسێنپەناهی ڕوون نەکراوەتەوە و هیچ زانیارییەک لەسەر ئەو تۆمەتە ئەگەرییانەی خراونەتە پاڵیان، دەستڕاگەیشتنیان بە پارێزەر و ئەو ناوەندە دادوەرییەی کە پێڕاگەییشتن بە دۆسیەکەیان دەکات، لەبەردەستدا نییە.