یەعقوب کەریمپوور بە تۆمەتی بێبنەمای «سیخوڕی بۆ ئیسرائیل» لەسێدارە درا؛ مرۆڤێکی کرێچی، بێکار و خاوەن پێداویستیی تایبەت کە لە گێڕانەوە دەنگییەکەی خۆیدا باس لە ئەشکەنجە، بێبەشکردن لە دەرمان، گوشاری جەستەیی و دەروونی و لێپرسینەوە لە هاوسەرەکەی لە ژوورێکی دیکەدا دەکات. ئەم دەنگە، تەنیا گێڕانەوەی بەندکراوێک لە ئازارێکی کەسی نییە؛ بەڵکوو بەڵگەیەکی تهزێنهره لە توندوتیژیی حکوومەتێک کە سەرەتا مرۆڤ لە مافی بەرگری، تەندروستی، ئاسایش و کەرامەت بێبەش دەکات و دواتر ناوی ئەم پڕۆسەیە دەنێت «جێبەجێکردنی دادپەروەری».
کۆماری ئیسلامی ژیانی لە یەعقوب کەریمپوور سەندەوە، بەڵام پێش ئەوە، بە ئەشکەنجە، سووکایەتی، بێبەشکردنی دەرمانی و گوشار بۆ سەر بنەماڵەکەی، کەرامەتی مرۆیی ئەوی کردبووە ئامانج. بیستنی ئەم دەنگە ئاسان نییە؛ چونکە لە هەر ڕستەیەکیدا، ئازاری مرۆڤێک دەبینرێت کە لە بەرامبەر دەزگایەکی بێبەزەییدا بە تەنیا مابووەوە.
هانا بڵاوکردنەوە و بیستنی ئەم گێڕانەوەیە بە بیرهێنانەوەی بەرپرسیارێتییەکی مرۆیی و یاسایی دەزانێت: نابێ ڕێگە بدرێت دەنگی قوربانیانی لەسێدارەدان، ئەشکەنجە و سەرکوت لە بێدەنگیدا بنێژرێت. یەعقوب کەریمپوور تەنیا ناوێک لە لیستی لەسێدارەدراواندا نییە؛ ئەو شایەتێکی زیندووە لەسەر ناوەرۆکی دەزگایەک کە بۆ مانەوەی خۆی، ئازاری مرۆڤ، ئەشکەنجەی بنەماڵە و مەرگی بێتاوانان دەکاتە ئامراز.