ڕێکخراوی مافی مرۆڤی هانا بە دەربڕینی نیگەرانییەکی قووڵ سەبارەت بە ئاگرکەوتنەوە بەرفراوانەکەی ئێوارەی ڕۆژی سێشەممە ١٥ی بانەمەڕ لە کۆمەڵگەی بازرگانیی ئەرخەوان هەڵکەوتوو لە فازی چواری شاری ئەندێشەی شارستانی شەهریار، ئەم ڕووداوە وەک نموونەیەکی مەترسیداری لاوازیی جیدی لە چاودێریکردنی ستانداردەکانی سەلامەتیی باڵەخانە گشتی و بازرگانییەکان لە ئێران دەزانێت. بەپێی ڕاپۆرتە فەرمییە بڵاوکراوەکان، ئەم ئاگرکەوتنەوەیە کە لە نمای باڵەخانەکەوە دەستی پێکردووە و بە خێرایی تەشەنەی بۆ هەموو نهۆمەکان سەندووە، گیانی لانی کەم ١١ هاووڵاتی گرتووە و بووەتە هۆی برینداربوونی ٤١ کەسی دیکە. بەگوێرەی ڕاگەیەندراوی سەرچاوەکانی فریاکەوتن، زۆربەی بریندارەکان بە شێوەی سەرپێی چارەسەر کراون و تەنیا یەک کەس بەهۆی سەختیی برینەکەیەوە بۆ ناوەندی دەرمانی گواستراوەتەوە.
کۆمەڵگەی بازرگانیی ئەرخەوان کە زیاتر لە ٢٥٠ یەکەی بازرگانی، ٥٠ یەکەی کارگێڕی و چەندین کۆمەڵگەی وەرزشی لەخۆ گرتبوو، لە ئەنجامی ئەم ڕووداوەدا تووشی زیانێکی زۆری دارایی و وێرانکارییەکی سەخت بووەتەوه. توندیی ئاگرەکە و قەبارەی گەورەی ئەو دووکەڵەی لێی کەوتووەتەوە بەجۆرێک بووە کە لە ناوچە جیاجیاکانی ڕۆژئاوای تاران و کەرەجیشەوە بینراوە. هەروەها سەرەڕای ڕاگەیاندنی سەرەتایی سەبارەت بە نەبوونی کەسانی گیرخواردوو لەناو باڵەخانەکەدا، ئۆپراسیۆنی گەڕان و فریاکەوتن بۆ ماوەی چەند کاتژمێرێک بە مەبەستی ڕزگارکردنی گیرخواردووە ئەگەرییەکان بەردەوام بووە.
ڕێکخراوی مافی مرۆڤی هانا جەخت دەکاتەوە کە دووبارەبوونەوەی ئەم جۆرە ڕووداوانە، پێویستیی وەڵامدەرەوەبوونی دامەزراوە بەرپرسەکان لە بواری چاودێریی شار، سەلامەتیی باڵەخانەکان و جێبەجێکردنی ستانداردە پارێزگارییەکان زیاتر لە هەمیشە دەردەخات. لەم پێناوەدا، داواکاری گشتی و شۆڕشی شەهریار هەواڵی دەرچوونی فەرمانی دەستبەسەرکردنی دروستکەری باڵەخانەکە و ئەو کەسەی کە وەک هۆکاری سەرەتایی دەستپێکردنی ئاگرەکە ناسێندراوە ڕاگەیاندووە؛ کارێک کە لە چوارچێوەی لێکۆڵینەوە لە کەمتەرخەمیی ئەگەری و ناساندنی بەرپرسانی ئەم کارەساتەدا ئەنجام دراوە.
ڕێکخراوی مافی مرۆڤی هانا داوای ئەنجامدانی لێکۆڵینەوەی شەفاف، سەربەخۆ و گشتگیر دەربارەی هۆکارەکانی ڕوودانی ئەم ڕووداوە، ئاستی ڕەچاوکردنی بنەماکانی سەلامەتی و ڕۆڵی دامەزراوە چاودێرییە پەیوەندیدارەکان دەکات و جەخت لەسەر پێویستیی زامنکردنی مافی هاووڵاتیان بۆ بەهرەمەندبوون لە ژینگەیەکی سەلامەت دەکاتەوە.