بەپێی ئەو زانیارییانەی بە ڕێکخراوی مافی مرۆڤی هانا گەیشتوون، بەرەبەیانی یەکشەممە ١١ی گەلاوێژی ١٤٠٥ی هەتاوی ، لە ئەنجامی ڕووداوێکی چەکدارانە لە نزیک گوندی سنووریی «سیاناو»ی سەر بە شاری مەریوان، سەربازێکی ئەرتەشی کۆماری ئیسلامیی ئێران بە ناوی «ئەبولفەزل گودەرزی» کوژرا و هێزێکی سەربازیی دیکەش بریندار بوو و بۆ چارەسەری پزیشکی بۆ ناوەندە دەرمانییەکان گواسترایەوە.
لەسەر بنەمای ئەو زانیارییانەی بە هانا گەیشتوون، ئەم ڕووداوە لە نزیک یەکێک لە پێگەکانی تیپی ٣٢٨ی ئەرتەش و لە چوارچێوەی گرژییە چەکدارییەکانی نێوان هێزە حکوومییەکان و یەکێک لە حیزبە کوردستانییەکاندا ڕووی داوە.
ئەرتەشی کۆماری ئیسلامی ئیدیعای کردووە کە ئەم پێگەیە بە بەکارهێنانی دوو درۆنی خۆکوژی بچووک و ڕاکێتی ئارپیجی کراوەتە ئامانج و بەرپرسیارێتییەکەی خستووەتە ئەستۆی «پژاک».
بەڵام، تا کاتی ئامادەکردنی ئەم ڕاپۆرتە، هیچ گرووپێک بە شێوەیەکی فەرمی بەرپرسیارێتیی ڕووداوەکەی نەگرتووەتە ئەستۆ و هانا دەستی بە هیچ بەڵگەیەکی سەربەخۆ نەگەیشتووە کە ناسنامەی لایەنە شەڕکەرەکان و وردەکاریی تێکهەڵچوونەکە بە شێوەیەکی بنبڕ بسەلمێنێت.
هانا لە دۆخی ئێستادا ئەم ڕووداوە وەک ڕووداوێکی چەکداریی نادیار لە نێو شریتی سنووریی مەریواندا تۆمار دەکات و تا کاتی بەدەستهێنانی بەڵگەی پێویست، لە خستنەپاڵی بنبڕی بەرپرسیارێتی یان پێشکەشکردنی پۆلێنکردنی کۆتاییی یاسایی دەربارەی ماهییەتی ململانێکە خۆ دەپارێزێت.