بەپێی ڕاپۆرتە گەیشتووەکان بە ڕێکخراوی مافی مرۆڤی هانا، سەرەڕای تێپەڕبوونی
چەندین هەفتە بەسەر دەستبەسەرکرانی هاووڵاتییەک بە ناوی «سیاوەش عەزیزیموقەدەم»،
خێزاندار، باوکی دوو منداڵ و خەڵکی شاری مەهاباد، هێشتا هیچ زانیارییەکی ورد لەسەر
دۆخی تەندروستی، چارەنووس و شوێنی ڕاگرتنی لەبەردەستدا نییە.
بەپێی زانیارییەکان، دەستبەسەرکردنی بەڕێز عەزیزیموقەدەم بەبێ نواندنی هیچ جۆرە
حوکمێکی دادوەری و لەلایەن هێزە ئەمنییەکانەوە ئەنجام دراوە. بێبەشکردنی
بنەماڵەکەی لە هەر چەشنە زانیارییەک دەربارەی شوێنی ڕاگرتن، باری جەستەیی و
یاسایی، و هۆکارەکانی دەستبەسەرکردنی، نموونەی ئاشکرای پێشێلکردنی مافی
دەستڕاگەیشتن بە زانیاری، مافی دادگاییکردنی دادپەروەرانە و مافی
پەیوەندی بە بنەماڵە و پارێزەرە.
تا کاتی بڵاوکردنەوەی ئەم ڕاپۆرتە، هیچ زانیارییەکی فەرمی لەسەر هۆکاری
دەستبەسەرکردن، ئەو ناوەندەی کە دەستبەسەری کردووە، شوێنی ڕاگرتن و ئەو
تۆمەتانەی ئەگەری هەیە خرابێتنە پاڵ ئەم هاووڵاتییە، ڕانەگەیەندراوە.
ڕێکخراوی مافی مرۆڤی هانا نیگەرانیی قووڵی خۆی بەرانبەر بە بەردەوامیی بێدەنگی لە
چارەنووسی سیاوەش عەزیزیموقەدەم دەردەبڕێت و داوای ڕاگەیاندنی دەستبەجێی
دۆخ وشوێنی ڕاگرتنی، دابینکردنی مافی دەستڕاگەیشتن بە پارێزەر و بنەماڵە، و ڕەچاوکردنی تەواوی مافە یاسایییەکان و پرۆسەی دادگاییکردنی دادپەروەرانە لە دۆسیەکەیدا دەکات.