بە پێی ڕاپۆرتی گەیشتوو بە رێکخراوی مافی مرۆڤی هانا: لە ڕۆژانی ڕابردوودا لوقمان ساڵحی زادە و عەلی حوسێنی دوو شارۆمەندی کوردی خەڵکی ئاوایی “دێوزناو”ی سەر بە سەوڵاوا، کە ڕۆژی یەکشەممە ١٨ی خەزەڵوەری ١٤٠٤، دوای بانگ کران بۆ ئیدارەی ئیتڵاعاتی ئەم شارە دەستبەسەر کرابوون، دوای کۆتایی هاتنی لێپرسینەوە لە گرتووخانەی ئیدارەی ئیتڵاعاتی مەریوانەوە بۆ قەرەنتینەی بەندیخانەی ئەم شارە ڕاگوێزڕاون.
هەروەها لەگەڵ تێپەڕ بوونی پازدە ڕۆژ بە سەر کاتی دەستبەسەر کردنی سەرەڕۆیانەی دوو شارۆمەندی تر بە ناوەکانی یاسر ئەدوایی و سوبان ئەدوایی خەڵکی ئاوایی سلێنی سەر بە سەوڵاوا کە لە رێکەوتی ٢٢ی خەزەڵوەری ١٤٠٤، دوای بانگ کران بۆ ئیدارەی ئیتڵاعاتی ئەم شارە دەستبەسەر کرابوون، هێشتا هیچ زانیاریەک لە سەر چارەنوس و شوێنی ڕاگیرانیان لە بەردەستدا نیە.
شایانی باسە یاسر ئەدوایی لە مانگی جۆزەردانی ساڵی ١٣٩٩، لە لایەن ئیدارەی ئیتڵاعاتەوە دەستبەسەر کرا و دوای ٤٥ ڕۆژ بە دانانی بارمتە ئازاد کرا و لە پاییزی هەمان ساڵدا لە لایەن دەسەڵاتی دادوەری کۆماری ئیسلامیەوە بە تۆمەتی “پیلانگێڕی لە دژی ئاسایشی نەتەوەیی لە ڕێگای هاوکاری لەگەڵ حزبی پژاک، سزای پێنج ساڵ بەندکرانی تەعزیری بە سەردا سەپێندرا و ئەم سزایە لە دادگای تێهەڵچوونەوە بۆ سێ ساڵ کەم کرایەوە.ئەو لە مانگی ڕێبەندانی هەمان ساڵدا بە مەبەستی جێبەجێ کرانی سزاکەی بۆ بەندیخانەی مەریوان ڕاگوێزرا و دوای کۆتایی هاتنی ماوەی سزاکەی ئازاد کرابوو.