بەپێی زانیارییەکانی ڕێکخراوی مافی مرۆڤی هانا، ڕۆژی یەکشەممە ٢٥ی خەزەڵوەری ١٤٠٤ (١٦ی نۆڤەمبەری ٢٠٢٥)، کەسێک بە ناوی “جەلال حوسێنی” بە چەک تەقەی لە هاوسەر و خەزووری “نەمام فەرهوش” دایکی دوو منداڵ و “خالد فەرهوش” دانیشتووی شاری مەهاباد” لە گەڕەکی ناسراو بە زەوینەکانی شارەداری ئەم شارە کردووە هەر دووکیانی کوشتووە.
سەرچاوەیەکی ئاگادار لە وتوێژێک لە گەڵ هانا ڕایگەیاند، نەمام فەرهوش و هاوسەرەکەی جەلال حوسێنی ماوەیەکی زۆر بوو لە ناکۆکییەکی گەورەی هاوسەرگیریدا بوون و دۆسیەی جیابوونەوەیان لە دادگای بنەماڵەی ئەم شارە لەهاتووچودا بوو.
بەپێی لێکۆڵینەوەکانی هانا، بکوژەکە دوای ئەنجامدانی کوشتنەکە لە شوێنی تاوانەکە هەڵاتووە و لە سنووری تورکیا دەستبەسەر کراوە بەڵام لە کاتی دەستبەسەر کرانی دەرمانی خواردووە و پێش ڕاگوێزانی بۆ نەخۆشخانە کۆتایی بە ژیانی خۆی هێناوە.
ڕێکخراوی مافی مرۆڤی هانا وێڕای مەحکوم کردنی ئەم قەتڵانە، جارێکی دیکە جەخت لەوە دەکاتەوە کە نەبوونی یاسای کاریگەر بۆ پاراستنی ژنان هۆکاری سەرەکی ئەم جۆرە کارەساتانەیە. پێدانی سەرۆکایەتی بنەماڵە بە پیاوان بە پشتبەستن بە یاسای مەدەنی و بوونی چەمکی فیقهی هەڵاواردن و نامرۆڤانەی وەک “ملکەچبوون بۆ مێرد” و “نافەرمانی ژن” لە سیستەمی یاسایی کۆماری ئیسلامی ئێراندا بە هۆکاری سەرەکی پشت قەتڵی ناموسی لە ئێران دادەنرێت.