هانا: شەوی شەممە ١٥ی جۆزەردانی ١٤٠٠ – (٥ی ژوئەنی ٢٠٢١)، کچێکی منداڵکار لەلایەن چەند ماتۆرسوارەوە هێرشی کرایە سەر و بە قەمچی لێیاندا. دوای ئاگادار کردنی پۆلیس و سەرەڕای ئەوەی ماتۆرسوارەکان بە پۆلیس و هێزی ئینتزامی ناسێندران و روخساریان دیتبوون بەڵام هیچ لێکۆڵینەوەیەکیان لە سەر شکایەتەکە نەکردووە.
ئەم رووداوە لە گەڕەکی "فەرهەنگیان"ی بۆکان کاتژمێر ١١ لە کاتێکدا روویداوە کە ئەم کچە لەگەڵ ئاواڵ و هاتەمەنەکانی لە دەرەوە و لە بەر دەرگای ماڵی خۆیان خەریکی کایە بووە. لەو کاتەدا ٢ کەسی ماتۆرسوار بەوێدا هاتوون و هێرشیان کردووەتە سەر ئەو منداڵە و بە قەمچی لێیان داوە کە شوێنەواری قەمچییەکە بە روخسار و لەشییەوە ماوە. جێگای ئاماژەیە ئەم کچە منداڵکارە تەمەنی ٩ ساڵە و لەگەڵ باقی منداڵانی هاوڕێی لە کۆڵاندا کایە و گەمەیان کردووە.
شایانی باسە ماوەیەکە تاقمێک ماتۆرسوار بە نێو شار و گەڕەکەکانی بۆکاندا دەگەڕێن و خەڵک ئازار و ئەزیەت دەکەن و هێزە ئینتزامییەکانیش کە دەبوو پارێزەری ئەمنییەت و ئاسایشی شارۆمەندان بن، هەر وەک لەم راپۆرتەدا دەردەکەوێ هیچ کاردانەوەیەکیان نییە.
بەپێی جاڕنامەی جیهانی مافەکانی مرۆڤ کە حکومەتی ئیسلامی ئێرانیش واژۆی کردووە، پاراستنی ئەمنییەت و ئاسایشی شارۆمەندان لە ئەستۆی حکومەتە. بۆ بەرچاو ڕوونی زیاتر لە خوارەوە بەندەکانی ٣، ٨ و ٢٢ی جاڕنامەی جیهانی مافەکانی مرۆڤ وەک خۆی دێنین.
بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە.
بەندی ٨- هەر مرۆڤێک کە مافی پێشێل دەکرێ و ئەو مافانە لە یاسای بنەڕەتی وڵاتدا یان یاسای دیکە وەک مافی سەرەتایی ئینسان پەسند کراون و دانیان پێدانراوە، حەقی خۆیەتی دەستی بە دادگای نەتەوەیی و باوەڕپێکراو رابگا و هانای بۆ بەرێ و داوای پێڕاگەیشتن بە سکاڵاکەی بکا.
بەندی ٢٢- هەر کەسێک وەک ئەندامێکی کۆمەڵگا مافی ئەمنییەتی کۆمەڵایەتی هەیە و بۆی هەیە لە رێگای هاوکارییە نەتەوەیی و نێونەتەوەییەکانەوە، ئەو مافە ئابووری، کۆمەڵایەتی و فەرهەنگییانەی بۆ پاراستنی ئابڕوو و کەڕامەت و گەشە کردنی ئازادیی کەسایەتی خۆی پێویستنی، بە سەرنجدان و لەبەرچاوگرتنی رێکخراوە و سەرچاوەکانی وڵات وەدەستیان بێنێ.