هانا بە پشتبەستن بە ڕاپۆرتێکی تۆڕی بەڵگەنامەی مافی مرۆڤی بەلووچستان، ئێوارەی ڕۆژی چوارشەممە ٢ی گوڵانی ١٤٠٥، دوو هاووڵاتی بەلووچ بە ناوەکانی محەممەد ئیسلام سەعیدی تەمەن نزیکەی ٣١ ساڵ کوڕی موسا و محەمەد ئەکرەم ئەختەری تەمەن نزیکەی ٢٨ ساڵ کوڕی موراد محەمەد کە هەردووکیان خەڵکی گوندی دارچووب لە ناحیەی سەرکۆڕ سەربەشاری سەربازن، بەهۆی تەقەی ڕاستەوخۆی هێزەکانی سوپای پاسداران لە ڕاسک کوژران.
بەگوێرەی ئەم ڕاپۆرتە، ئەو دوو هاووڵاتییە سەرقاڵی لێخوڕینی ئۆتۆمبێلەکەیان بوون، هێزەکانی سوپای پاسداران بەبێ ئەوەی داوای وەستانیان لێبکەن، یان هۆشدارییەکی کاریگەریان پێبدات، یان دەرفەتی وەستانیان بۆ بڕەخسێنن، تەقەیان لێکردوون. دوای ئەوەی چەند فیشەکێکیان لێدرا، گیانیان لەدەستدا.
میدیاکانی سەر بە دەوڵەت، لەوانەش ئاژانسی هەواڵی فارس، بە پشتبەستن بە سەرچاوە ئەمنییەکان، ئیدیعایان کردووە کە کوژراوەکان ئەندامی “تیمێکی چەکدار” بوون. بەڵام کەسوکاری ئەو دوو هاوڵاتییە ئەو بانگەشەیەیان ڕەتکردۆتەوە و ڕایانگەیاندووە کە هاوڵاتی ئاسایی بوون و هیچ پەیوەندییەکیان بە گروپە چەکدارەکانەوە نەبووە.
تەنانەت لە ئەگەری نیگەرانییەکی ئەمنیشدا، بەکارهێنانی هێزی کوشندە تەنیا کاتێک دەتوانرێت ڕەوا ببینرێت کە مەترسییەکی دەستبەجێ و ڕاستەقینە و خۆپارێزی لەسەر ژیانی ئەفسەرەکان یان کەسانی دیکە هەبێت و هیچ ئامرازێکی دیکەی کەمتر مەترسیدار لەبەردەستدا نەبێت بۆ دوورکەوتنەوە لە مەترسییەکە. تەقەکردنی ڕاستەوخۆ بەبێ ئاگادارکردنەوەی کاریگەر و بەبێ نیشاندانی پێویستییەکی دەستبەجێ و بەبێ پێدانی زانیاری ڕوون سەبارەت بە ڕەوتی ئۆپەراسیۆنەکە، پێشێلکردنی بنەماکانی پێویستی و ڕێژەیی و لێپرسینەوە لە بەکارهێنانی هێزدا و دەتوانێت ببێتە ئەستاندنی ئارەزوومەندانەی مافی ژیان.