بەرەبەیانی ڕۆژی سێشەممە ٢٢ی بانەمەڕ، تەقەی ڕاستەوخۆی هێزەکانی بەسیج لە بازگەیەکی پشکنین لە شارستانی بناو، بووە هۆی گیانلەدەستدانی هاوڵاتییەکی تەمەن ٣٥ ساڵ بە ناوی ئیحسان شیرخانی. بەپێی ڕاپۆرتەکانی “هانا”، هێزەکانی ئەو بازگەیە بە بیانووی “گوێنەدان بە فەرمانی ڕاوەستان”، ئۆتۆمبێلی ئەو هاوڵاتییەیان کردووەتە ئامانجی تەقەی ڕاستەوخۆ.
سەرچاوەیەکی ئاگادار لە وتووێژێکدا لەگەڵ هانا ڕایگەیاند کە هێزەکانی بەسیج بەبێ ڕەچاوکردنی یاساکانی “یاسای بەکارهێنانی چەک”، وەک تەقەی هەوایی، بەکارهێنانی ڕێگەی ڕێگری یان پێکانی تایەی ئۆتۆمبێلەکە، ڕاستەوخۆ ژووری ئۆتۆمبێلەکەیان پێکاوە. بە وتەی ئەو سەرچاوەیە، لە ئەنجامی ئەو تەقەیەدا، چوار فیشەک بەر جەستەی ئیحسان شیرخانی کەوتووە و لە شوێنی ڕووداوەکەدا گیانی لەدەستداوە.
تا کاتی بڵاوکردنەوەی ئەم ڕاپۆرتە، هیچ کام لە ناوەندە بەرپرسەکان ڕوونکردنەوەیەکی شەفافیان سەبارەت بە وردەکارییەکانی ئەم تەقەیە یان دۆخی ئەو هێزانەی لە ڕووداوەکەدا تێوەگلاون، نەخستووەتە ڕوو.
هانا وێڕای شەرمەزارکردنی ئەم کارە، جەخت دەکاتەوە کە بەپێی ماددەی ٧ی یاسای بەکارهێنانی چەک لەلایەن مامورانی هێزە چەکدارەکانەوە، بەکارهێنانی چەکی گەرم تەنها لە بارودۆخی پێویستیی ڕەها و بە ڕەچاوکردنی پرەنسیپی گونجاندن ڕێگەی پێدراوە. تەقەی ڕاستەوخۆ بۆ بەشە هەستیارەکانی جەستەی هاوڵاتییان، بەبێ بوونی مەترسییەکی گیانیی دەستبەجێ، بە پێشێلکردنی ئاشکرای مافی ژیان و پێچەوانەی پابەندییە نێودەوڵەتییەکانی کۆماری ئیسلامیی ئێران، لەوانە ماددەی ٦ی پەیمانی نێودەوڵەتیی مافە مەدەنی و سیاسییەکان هەژمار دەکرێت.
هەروەها هانا هۆشداری دەدات کە بەردەوامیی بەکارهێنانی نایاسایی چەک لەلایەن هێزە سەربازی و نیمچە سەربازییەکان لە بازگەکانی پشکنین، لەپاڵ نەبوونی لێکۆڵینەوەی سەربەخۆ و پارێزراوی بکەرانی ئەم کردەوانە، زەمینەی دووبارەبوونەوەی پێشێلکارییە جیدییەکانی مافی مرۆڤ و زەوتکردنی خۆسەرانەی ژیانی هاوڵاتییانی ڕەخساندووە.