بەپێی ڕاپۆرتە گەیشتووەکان بە ڕێکخراوی مافی مرۆڤی هانا، ئەمڕۆ شەممە ١٦ی جۆزەردانی ١٤٠٥ی هەتاوی (٦ی حوزەیرانی ٢٠٢٦)، محەممەد ڕەزایی، چالاکی مەدەنیی خەڵکی دێولان و ئەندامی ئەنجومەنی فەرهەنگی – کۆمەڵایەتیی «نۆژین»، دوای سەردانی ناوەندی دادوەری، بۆ جێبەجێکردنی حوکمەکەی ڕەوانەی زیندان کرا.
سەرچاوەیەکی ئاگادار بە هانای ڕاگەیاند: «محەممەد ڕەزایی ئەمڕۆ بۆ بەدواداچوونی دۆسیەکەی چووەتە دادگا، کە لە کۆتاییی دانیشتنەکەدا حوکمی سزادانی پێ ڕاگەیەندراوە و بۆ تێپەڕاندنی ماوەی بەندکرانەکەی بۆ زیندان گواستراوەتەوە.»
بەپێی زانیارییە گەیشتووەکان، ئەم چالاکە مەدەنییە لە تەواوی قۆناغەکانی دادگاییکردندا، ئەو تۆمەتانەی خرابوونە پاڵی وەک تۆمەتی بێبنەما ناساندووە و ڕەتی کردوونەتەوە.
محەممەد ڕەزایی لە چالاکانی مەدەنیی ناسراوی شاری دێولان و ئەندامی ئەنجومەنی فەرهەنگی – کۆمەڵایەتیی «نۆژین»ە. ناوبراو لە ساڵانی ڕابردوودا چەندین جار لەلایەن ناوەندە ئەمنییەکانەوە دەستبەسەر کراوە و بەهۆی چالاکییە مەدەنییەکانیەوە ڕووبەڕووی دۆسیەی دادوەری و حوکمی بەندکران بووەتەوە.
ڕێکخراوی مافی مرۆڤی هانا وێڕای دەربڕینی نیگەرانی بەرانبەر بە بەردەوامیی گوشارە ئەمنی و دادوەرییەکان دژی چالاکانی مەدەنی، جەخت لەسەر پێویستیی ڕەچاوکردنی بنەماکانی دادرەسیی دادپەروەرانە، گەرەنتی کردنی مافی دەستڕاگەیشتن بە پارێزەر و ڕەچاوکردنی تەواوی مافە یاسایییەکانی تۆمەتباران دەکاتەوە. هانا هەروەها داوای شەفافیەت لە پرۆسەی پێڕاگەییشتن بە دۆسیەی چالاکانی مەدەنی و کۆتاییهێنان بە ڕەفتارە ئەمنییەکان بەرانبەر بە چالاکییە مەدەنییە ئاشتیخوازانەکان دەکات.