بەپێی ڕاپۆرتە گەیشتووەکان بە ڕێکخراوی مافی مرۆڤی هانا، ڕۆژی شەممە ٥ی بانەمەڕی ١٤٠٥ی هەتاوی (٢٥ی ئاوریلی ٢٠٢٦)، هاووڵاتییەک بە ناوی “شیرکۆ تابناک” تەمەن ٣٨ ساڵ و خەڵکی شاری بۆکان، لەلایەن هێزەکانی ئیدارەی ئیتلاعاتی ئەو شارە دەستبەسەر و بۆ شوێنێکی نادیار گواستراوەتەوە.
بەپێی زانیارییەکان، هێزە ئەمنییەکان بەبێ نواندنی هیچ جۆرە حوکمێکی دادوەری، هێرشیان کردووەتە سەر ماڵی باوکی ئەم هاووڵاتییە و بە پەنابردن بۆ توندوتیژی دەستبەسەریان کردووە.
سەرەڕای تێپەڕبوونی چوار ڕۆژ بەسەر دەستبەسەرکرانی بەڕێز تابناک، تا ئێستا هیچ زانیارییەک لەسەر هۆکاری دەستبەسەرکردن، شوێنی ڕاگرتن و ئەو تۆمەتانەی خراونەتە پاڵی لەبەردەستدا نییە.
شایانی باسە، شیرکۆ تابناک پێشتریش بەهۆی چالاکییە سیاسی و مەدەنییەکانی، چەندین جار لەلایەن ناوەندە ئەمنییەکانەوە دەستبەسەر کراوە. ناوبراو لانیکەم دوو جار لەلایەن دەزگای دادوەریی کۆماری ئیسلامیی ئێرانەوە سزای بەندکرانی بەسەردا سەپاوە و دوای تەواوکردنی ماوەی سزاکەی، لە زیندان ئازاد کرابوو.
دەستبەسەرکرانی شیرکۆ تابناک، بەندکراوی سیاسیی پێشوو لەلایەن هێزەکانی ئیدارەی ئیتلاعاتی بۆکان
