بەپێی ئەو زانیارییانەی گەیشتوونەتە ڕێکخراوی مافی مرۆڤی هانا، چوار هاووڵاتیی کوردی کرمانج، خەڵکی شارەکانی بۆجنورد و ئاشخانە، لە دەستبەسەرکراوانی ناڕەزایەتییەکانی بەفرانباری ١٤٠٤، لەلایەن دادگاکانی شۆڕش و کەیفەریی بۆجنوردەوە سەرجەم سزای ٩ ساڵ و ٩ مانگ بەندکرانی تەعزیری، قامچی و پێبژاردنی ٥٠ ملوێن تمەن جەریمەیان بەسەردا سەپا.
یەکێک لە سزادراوان بە ناوی «یاسین سەرفەراز»، منداڵی تەمەن ١٧ ساڵ و ئەندامی هەڵبژاردەی وەرزشی بۆکسی ئێرانە.
«مەهدی ڕۆستەمی»، تەمەن ٢٥ ساڵ و خەڵکی ئاشخانە، لە کۆتاییی مانگی ژوئیەی ٢٠٢٦ لەلایەن لقی دووی دادگای شۆڕشی بۆجنوردەوە بە تۆمەتەکانی «کۆبوونەوە و تەگبیر دژی ئاسایشی نەتەوەیی» و «پڕوپاگەندە دژی کۆماری ئیسلامی» سزای دوو ساڵ بەندکرانی تەعزیریی بەسەردا سەپا. پێڕاگەییشتن بە دۆسیەکەی بەبێ دەستڕاگەیشتن بە پارێزەر ئەنجام دراوە و بەرپرسانی دادوەری، وێڕای زەوتکردنی مافی ناڕەزایەتی دەربڕین، هەڕەشەیان لێ کردووە کە ئەگەر تانە لە حوکمەکە بگرێت، ماوەی سزاکەی زیاد دەکرێت. ناوبراو لە کۆتاییی مانگی ژوئیەی ١٤٠٤ بە هێرشی هێزە ئەمنییەکان بۆ سەر ماڵەکەی دەستبەسەر کرابوو.
«سەید عەلیرەزا سەیدی»، تەمەن ٢٦ ساڵ و خەڵکی ئاشخانە، لەلایەن لقی یەکی دادگای شۆڕشی بۆجنوردەوە بە تۆمەتی «کۆبوونەوە و تەگبیر بۆ ئەنجامدانی تاوان دژی ئاسایشی ناوخۆیی و دەرەکی» سزای سێ ساڵ بەندکرانی تەعزیریی بەسەردا سەپا. دانیشتنی دادگاکەی لە ١٢ی ژوئیەی ٢٠٢٦ بەڕێوە چوو و ناوبراو جگە لە بەندکران، بە لێدانی قامچیش سزا درا.
«ئەمیرمەهدی نەعیمیفەر»، وەرزشوانی تەمەن ١٨ ساڵی خەڵکی بۆجنورد، لە ڕێکەوتی ٢٢ی ژوئینی ٢٠٢٦ لەلایەن لقی چواری دادگای کەیفەریی بۆجنوردەوە، بەبێ هەبوونی پارێزەر، بە تۆمەتەکانی «تێکدانی نەزم و ئاسایشی گشتی» و «سەرپێچی لە فەرمانی هێزە ئەمنییەکان» سزای ساڵێک و شەش مانگ بەندکرانی تەعزیری و پێبژاردنی ٥٠ ملوێن تمەن جەریمەی بەسەردا سەپا.
هەروەها، «یاسین سەرفەراز»، منداڵی تەمەن ١٧ ساڵ، لە لقی چواری دادگای کەیفەریی پارێزگای خوراسانی باکوور، لە یەک دانیشتندا و بەبێ دەستڕاگەیشتن بە پارێزەری هەڵبژێردراو، بە تۆمەتی «کۆبوونەوە و تەگبیر دژی ئاسایشی نەتەوەیی» سزای سێ ساڵ و سێ مانگ بەندکرانی بەسەردا سەپا.
ڕێکخراوی مافی مرۆڤی هانا جەخت دەکاتەوە کە پێڕاگەییشتن بە دۆسیەی ئەم چوار هاووڵاتییە بەبێ دەستڕاگەیشتن بە پارێزەر و هەڕەشەکردن لێیان، پێشێلکردنی ئاشکرای بنەماکانی دادرەسیی دادپەروەرانەیە. هەروەها، دەرکردنی سزای بەندکران بۆ یاسین سەرفەراز لە کاتێکدا کە منداڵە، نیگەرانییەکان لەسەر پێشێلکردنی مافە تایبەتەکانی منداڵان لە پرۆسە دادوەرییەکاندا زیاد دەکات.