رێکخراوی مافی مرۆڤی هانا زانیویەتی کە فەردین مەولودی شارۆمەندی دەستبەسەر کراوی خەڵکی شاری سنە، لە لایەن لقی یەکەمی دادگای شۆڕشی ئەم شارە بە سەرۆکایەتی دادوەر “مستەفا عەزیزی” بە تۆمەتی “پیلانگێڕی لە دژی ئاسایشی نەتەوەیی” بە پێنج ساڵ بەندکرانی تەعزیری سزا دراوە و سزاکە ڕۆژی هەینی ٧ی سەرماوەزی ١٤٠٤، لە بەندیخانەی سنە بە فەرمی بەم شارۆمەندە ڕاگەیندراوە.
بە گوتەی سەرچاوەیەکی ئاگادار، ناوبراو کێشەی قوڵی دەرونی هەیە و بەپێی بەڵگەنامە پزیشکیەکان پێویستی بە خزمەتگوزاری بەردەوام و چاوەدێری چڕی پزیشکی هەیە لەگەڵ ئەم دۆخە، لەگەڵ ئەوەیکە ناردنی ئەو بۆ لای پزیشکی دادوەری کارێکی زەرووری و یاساییە، تا ئێستا هیچ هەنگاوێک لەمبارەوە لە لایەن بەرپرسانی دادوەری و بەندیخانە نەگیراوەتە بەر.
شایانی باسە فەردین مەولودی لە رێکەوتی ٧ی پوشپەڕی ١٤٠٤، بە شێوەی سەرەڕۆیانە لە لایەن هێزە ئەمنییەکانەوە دەستبەسەر کرا و بۆ گرتووخانەیەکی ئەمنی ڕاگوێزرا و دوای مانگێک لێپرسینەوە بەبێ بەڕێوەچوونی پڕۆسەیەکی دادوەری دادپەروەرانە بۆ بەندیخانەی ناوەندی سنە ڕاگوێزرا.