بەپێی ئەو زانیارییانەی گەیشتوونەتە ڕێکخراوی مافی مرۆڤی هانا، خالق خالیدی، هاووڵاتیی خەڵکی گوندی بێژاوێی سەر بە شاری شنۆ، لە کۆتاییەکانی ڕەزبەری ١٤٠٥ەوە لەلایەن هێزە ئەمنییەکانەوە دەستبەسەر کراوە و بۆ شوێنێکی نادیار ڕاگوێزراوە. بە تێپەڕبوونی زیاتر لە دوو حەفتە بەسەر دەستبەسەرکردنیدا، هێشتا هیچ زانیارییەک سەبارەت بە چارەنووس و شوێنی ڕاگرتنی لەبەر دەستدا نییە.
بەپێی زانیارییە بەدەستهاتووەکان، دەستبەسەرکردنی ئەم هاووڵاتییە دوای هەڵکوتانی هێزە ئەمنییەکان بۆ سەر ماڵەکەی و بەبێ نیشاندانی هیچ بڕیارێکی دادوەری ئەنجام دراوە.
شایانی باسە، خالق خالیدی لە کاتی دەستبەسەرکردنیەوە تاکوو ئێستا لە مافی دەستڕاگەیشتن بە پارێزەر، چاوپێکەوتن و پێوەندی لەگەڵ بنەماڵەکەی بێبەش کراوە.