بەپێی ئەو زانیارییانەی دەست هانا کەوتوون، یونس بەکری، یاسر هەواسی زادە و ڕوحوڵڵا غوڵامی، سێ هاووڵاتیی خەڵکی ئاسماناوای سەر بە پارێزگای ئیلام، کە لە ڕۆژانی ٢ و ٣ی خەرمانانی ١٤٠٥ لەلایەن هێزە ئەمنییەکانەوە دەستبەسەر و بۆ شوێنێکی نادیار گوازراونەتەوە، تا ئێستاش لە دەستڕاگەیشتن بە زانیاری ڕوون سەبارەت بە دۆخ و پرۆسەی دۆسیەکەیان بێبەشن.
دەستگیرکردنی ئەو سێ هاووڵاتییە دوای تێکهەڵچوون لە نێوان هێزە ئەمنییەکان و ژمارەیەک لە دانیشتووانی ئاسماناوا بووە. بەگوێرەی ئەو زانیارییانەی دەستمان کەوتووە، لە کاتی تێکهەڵچوونەکەدا، هێزە ئەمنییەکان تەقەیان کردووە و ژمارەیەک کەس بە گوللە برینداربوون و دواتر دەستگیرکراون. هەروەها هێزەکانی ئیتلاعاتی سوپای پاسداران لەم ئۆپەراسیۆنەدا بەشدار بوون.
بەڵام تا ئێستا هیچ وردەکارییەکی سەربەخۆ لەبارەی هۆکاری دەستپێکردنی تێکهەڵچوونەکە و ژمارەی کەسانی بەشداربوو و چۆنیەتی مامەڵەکردنی هێزە ئەمنییەکان لەگەڵ دانیشتووانی ئاسماناوا لە بەردەستدا نییە.
ڕۆژی دووشەممە ٢٠ی خەرمانانی ١٤٠٥، کەناڵی تەلەفیزیۆنی پارێزگای ئیلام وێنەی یونس بەکری، یاسر حەواسی زادە و ڕوحوڵڵا غولامی لە تەنیشت کۆمەڵێک چەک لە چوارچێوەی بەرنامەیەکی ڤیدیۆییدا بڵاو کردەوە. لەم بەرنامەیەدا ناوەڕۆک و لێدوانەکانیش بۆ ئەو سێ هاووڵاتییە گەڕێندرانەوە و لە پێوەندی لەگەڵ ئەو چەکانەی نمایشکران و چالاکییە چەکدارییەکان بە بەپرسیار ناسێنران.
بە سەرنجدان بە نادیاری شوێنی ڕاگرتنی ئەو کەسانە و دەستنەگەیشتنیان بە پڕۆسەیەکی ڕوون و سەربەخۆ، هەروەها شێوازی بڵاوکردنەوەی وێنە و لێدوانەکان کە دەگەڕێندرێنەوە بۆیان لە میدیای فەرمیدا، نیگەرانییەکان لە ئەگەری تۆمارکردنی دۆسیەیەکی ئەمنی و دانانی تۆمەتی قورس لە سەر ئەو سێ هاووڵاتییە، زیاتر بووە.
تا کاتی ئامادەکرانی ئەم ڕاپۆرتە، زانیاری سەبارەت بە تۆمەتی فەرمی و باری دادوەری و شوێنی وردی دەستبەسەرکردنی یونس بەکری، یاسر هەواسی زادە، و ڕوحوڵڵا غوڵامی بڵاو نەکراوەتەوە.