بەپێی ئەو ڕاپۆرتانەی گەیشتوونەتە ڕێکخراوی مافی مرۆڤی هانا، ئێوارەی پێنجشەممە ١٧ی پووشپەڕی ١٤٠٥ی هەتاوی (٨ی ژوئیەی ٢٠٢٦)، لە ئەنجامی بەکارهێنانی چەکی گەرم لەلایەن هێزە چەکدارەکانەوە لە گوندی «دەرۆکێ»ی سەر بە شاری مەریوان، «سام حەسەنی»، منداڵێکی تەمەن ١٢ ساڵ، گیانی لەدەستداوە و باوکی، «ئەحسەن حەسەنی»، بریندار بووە.
بەپێی ئەو زانیارییە سەرەتاییانەی ڕێکخراوی مافی مرۆڤی هانا لە چەندین سەرچاوەی خۆجێییەوە وەریگرتووە و هێشتا خەریکی ڕاستیئازمایی سەربەخۆیە بۆیان، ئەندامانی بنەماڵەی حەسەنی لە کاتی ڕووداوەکەدا لە ئۆتۆمبێلێکی تایبەتدا بوون کە هێزە چەکدارەکان بەبێ ئاگادارکردنەوەی پێشوەختە، تەقەیان لێ کردوون.لەسەر بنەمای زانیارییە بەردەستەکان، سام حەسەنی کە لە کورسیی دواوەی ئۆتۆمبێلەکەدا بووە، بەهۆی بەرکەوتنی دوو گوللە لە ناحیەی سەرەوە گیانی لەدەست داوە.
هەروەها ئەحسەن حەسەنی، باوکی بنەماڵەکە، کە لەگەڵ هاوسەر و منداڵە وردەکەی دیکەی لە پێشەوەی ئۆتۆمبێلەکە بوون، لە ناحیەی قاچییەوە پێکراوە و بریندار بووە. تەرمی سام حەسەنی بۆ پزیشکی دادی مەریوان گواستراوەتەوە و ئەحسەن حەسەنی بۆ بەردەوامیی چارەسەری پزیشکی ڕەوانەی یەکێک لە ناوەندە دەرمانییەکانی شاری سنە کراوە.ڕێکخراوی مافی مرۆڤی هانا هێشتا خەریکی ڕاستیئازمایی سەربەخۆیە بۆ تەواوی ڕەهەندەکانی ئەم ڕووداوە، لەوانەش ناسنامەی ئەو هێزانەی کە ئەم کردەوەیەیان ئەنجام داوە، ئەو ناوەندەی کە سەر بەوین، زنجیرە مەراتیبی فەرماندەیی، بنەمای یاساییی ئۆپەراسیۆنەکە و چۆنیەتیی بەکارهێنانی چەکی گەرم. تا کاتی بڵاوکردنەوەی ئەم ڕاپۆرتە، هیچ کام لە ناوەندە بەرپرسەکان دەربارەی هۆکاری ئۆپەراسیۆنەکە، بنەمای یاساییی بەکارهێنانی چەک یان باری لێکۆڵینەوەکان زانیارییەکی فەرمییان بڵاو نەکردووەتەوە.بەکارهێنانی چەک لەلایەن هێزە چەکدارەکانەوە لە کۆماری ئیسلامیی ئێراندا لەژێر چاودێریی «یاسای بەکارهێنانی چەک لەلایەن هێزە چەکدارەکان لە کاتی پێویستدا» (پەسندکراوی ١٣٧٣) دایە. بەپێی ئەم یاسایە، بەکارهێنانی چەک تەنیا لە حاڵەتی ناوازەدا و بە ڕەچاوکردنی مەرجە یاسایییەکان لەوانەش زەروورەت، گونجان، بەکارهێنانی چەک وەک دوایین ڕێگە و ڕاگەیاندنی فەرمانی ڕاوەستان و ئاگادارکردنەوە ڕێگەپێدراوە.
ئەگەر زانیارییە سەرەتایییەکانی ئەم دۆسیەیە لە لێکۆڵینەوە سەربەخۆکاندا پشتڕاست بکرێنەوە، تەقەکردن لە ئۆتۆمبێلێک کە ئەندامانی بنەماڵەیەکی تێدایە، بەبێ فەرمانی ڕاوەستان یان ئاگادارکردنەوەی پێشوەختە کە بووەتە هۆی کوژرانی منداڵێکی ١٢ ساڵە و برینداربوونی باوکی، گومانێکی جیدی لەسەر ڕەچاوکردنی پێویستییەکانی یاسای بەکارهێنانی چەک و ڕەوایەتیی بەکارهێنانی هێزی کوشندە دروست دەکات.کۆماری ئیسلامیی ئێران بەپێی ماددەی ٦ی میساقی نێودەوڵەتیی مافە مەدەنی و سیاسییەکان، پابەندە بە ڕێزگرتن و پاراستنی مافی ژیان. بەپێی لێکدانەوەی گشتیی ژمارە ٣٦ی لێژنەی مافی مرۆڤی نەتەوە یەکگرتووەکان، بەکارهێنانی هێزی کوشندە تەنیا ئەو کاتە ڕێگەپێدراوە کە بۆ پاراستنی گیان لە بەرانبەر مەترسییەکی حەتمیدا بێت. هەروەها بەپێی «پڕۆتۆکۆڵی مینێسۆتا دەربارەی لێکۆڵینەوە لە حاڵەتەکانی مردنی نایاسایی» (٢٠١٦)، هەر جۆرە مردنێک کە بەهۆی بەکارهێنانی هێزی کوشندە لەلایەن مەئموورانی حکوومییەوە ڕوو بدات، پێویستی بە ئەنجامدانی لێکۆڵینەوەیەکی سەربەخۆ، خێرا، بێلایەنانە و کاریگەر هەیە.
ئەم ڕووداوە هەروەها لە بارودۆخێکدا ڕوو دەدات کە لە ساڵانی ڕابردوودا چەندین حاڵەتی کوژران یان برینداربوونی هاووڵاتییان، لەوانەش منداڵان، کۆڵبەران، سووتەمەنیبەران و خۆپیشاندەران، لە ئەنجامی بەکارهێنانی چەکی گەرم لەلایەن هێزە سەربازی، ئینتیزامی و ئەمنییەکانی کۆماری ئیسلامیی ئێرانەوە، بەبێ ئەنجامدانی لێکۆڵینەوەی سەربەخۆ و وەڵامدەرەوەبوونی کاریگەر، لەلایەن ناوەندە مافی مرۆیییەکانەوە بەڵگەنامە کراون. بەردەوامیی ئەم دۆخە دەبێتە هۆی دروستبوونی شێوازێکی بونیادی لە «پارێزبەندی لە سزا یان بێ سزا مانەوە» دۆخێک کە لەگەڵ پابەندبوونەکانی دەوڵەت بۆ پاراستنی مافی ژیان، گەرەنتی کردنی سەروەریی یاسا و دابینکردنی مافی قوربانیان بۆ دەستڕاگەیشتن بە ڕاستی و دادپەروەری ناگونجێت.
بە لەبەرچاوگرتنی ئەم خاڵانە، ڕێکخراوی مافی مرۆڤی هانا داوای ئەنجامدانی خێرای لێکۆڵینەوەیەکی سزایی سەربەخۆ، بێلایەنانە و کاریگەر دەربارەی ئەم ڕووداوە، پاراستنی تەواوی بەڵگە و بەڵگەنامەکان، ناساندن و ئاشکراکردنی ئەو هێزانەی کە تەقەیان کردووە و فەرماندەکانیان، بڵاوکردنەوەی گشتیی ئەنجامی لێکۆڵینەوەکان، شوێنکەوتنی سزاییی تەواوی بەرپرسان و گەرەنتی کردنی مافی بنەماڵەی قوربانییەکە بۆ دەستڕاگەیشتن بە ڕاستی، دادپەروەری، قەرەبووکردنەوەی کاریگەری زیانەکان و گەرەنتیی دووبارەنەبوونەوە دەکات، ئەمەش بەپێی پابەندبوونەکانی کۆماری ئیسلامیی ئێران لە یاسا ناوخۆیی و یاسا نێودەوڵەتییەکانی مافی مرۆڤدا.
شایانی باسە، وێنەی بڵاو کراوە تایبەتە بە کات و شوێنی ئەسپەردەکردنی سام حەسەنی.