هاوڕێ یوسفی، منداڵی تەمەن ١٧ ساڵی کورد، خەڵکی ئاوایی “ئەڵک”ی سەر بە شاری کامێران، بەیانی یەکشەممە ٢٩ی خەرمانانی ١٤٠٥، بە هەڵکوتانە سەر ماڵەکەیان لە لایەن هێزەکانی ئیدارەی ئیتڵاعاتەوە دەستبەسەر و بۆ شوێنێکی نادیار ڕاگوێزراوە.
تا ساتی ئامادەکرانی ئەم ڕاپۆرتە، زانیاری ڕوون لە سەر هۆکاری دەستبەسەرکردن، شوێنی ڕاگرتن و بارودۆخی یاسایی ئەو لە بەردەستدا نیە.
ڕێکخراوی مافی مرۆڤی هانا جەخت لەوە دەکاتەوە کە بەپێی مافە نێودەوڵەتییەکانی منداڵان، هەر کەسێک لە خوار تەمەنی ١٨ ساڵەوە بە منداڵ دادەنرێت و مافی پاراستنی تایبەتی هەیە. ڕاگرتنی منداڵ پێویستە تەنها وەک ڕێکارێک بۆ دوا ڕێگە و بۆ کورتترین ماوە بەکاربهێنرێت و مافی منداڵەکە بۆ دەستڕاگەیشتن بە خێزان و پاراستنی یاسایی دەبێ گەرەنتی بکرێت.
تەنانەت یاساکانی کۆماری ئیسلامیش بڕگە و پاراستنی تایبەتیان لە پرۆسەی تاوانکاری بۆ منداڵانی خوار تەمەنی ١٨ ساڵ دابین کردووە.
رێکخراوی مافی مرۆڤی هانا ڕاگوێزانی منداڵێکی تەمەن ١٧ ساڵ بۆ شوێنێکی نادیار و بێئاگا کردنی بنەماڵەکەی لە بارودۆخی بە کردەوەیەکی زۆر نیگەرانکەر دەزانێت و داوای ڕاگەیاندنی خێرای شوێنی ڕاگرتن، باری تەندروستی و بنەمای یاسایی دەستبەسەر کردنی هاوڕێ یوسفی دەکات و هەروەها هانا داوای گرتنە بەری ڕێوشوێنی دەستڕاگەیشتنی ئەم منداڵە بە پارێزەر و چاوپێکەوتنی بنەماڵەکەی دەکات.