ئارشیا قەیسەربەیگی، هاووڵاتیی خەڵکی شارستانی سەرابڵە لە پارێزگای ئیلام، ڕۆژی ١٥ی بانەمەڕی ١٤٠٥، لە کاتی هێرشی هێزە ئەمنییەکاندا و بەبێ پێشکەشکردنی حوکمی دادوەری دەستبەسەر کراوە و بۆ شوێنێکی نادیار ڕاگوێزراوە.
بەپێی ئەو زانیارییانەی بە دەستی ڕێکخراوی مافی مرۆڤی هانا گەیشتوون، ڕادەی ئەو توندوتیژییەی لە کاتی دەستبەسەرکردنیدا بەکار هاتووە، لەو ئاستەدا بووە کە بووەتە هۆی شکانی شەویلکە، لووت و ددانەکانی. هەروەها هێزە ئەمنییەکان لە هەمان کاتدا بە تەمای دەستبەسەرکردنی «ئەرشەک قەیسەربەیگی» برای ناوبراویش بوون، بەڵام لەم هەوڵەیاندا سەرکەوتوو نەبوون.
سەرچاوەیەکی ئاگادار لە وتووێژێکدا لەگەڵ ڕێکخراوی مافی مرۆڤی هانا ڕایگەیاند کە ئارشیا قەیسەربەیگی سەرەڕای تێپەڕبوونی ١٢ ڕۆژ بەسەر کاتی دەستبەسەرکردنیدا، هێشتا لە ژووری تاکەکەسیدا ڕاگیراوە و سەرەڕای هەبوونی برینی سەخت، لە دەستڕاگەیشتن بە خزمەتگوزارییە دەرمانییەکان و چاودێریی پزیشکی بێبەش کراوە. بەپێی ئەم ڕاپۆرتە، ناوبراو لەژێر ئەشکەنجەی جەستەیی و گوشاری توندی ئەمنیدایە بە مەبەستی وەرگرتنی دانپێدانانی زۆرەملێ، و لە تەواوی ماوەی دەستبەسەرکردنەکەشیدا لە مافی دەستڕاگەیشتن بە پارێزەر، پەیوەندی و چاوپێککەوتن لەگەڵ بنەماڵەکەیدا بێبەش بووە.
تەنیا یەک ڕۆژ دوای دەستبەسەرکردنی، لە ڕێککەوتی ١٦ی بانەمەڕی ١٤٠٥، لقی لێکۆڵینەوەی دادسەرای گشتی و شۆڕشی شارستانی چەرداوڵ بە واژۆی «کەریم ئومێدی» ـ دادوەر و جێگری لێکۆڵەر ـ بڕیاری دەستبەسەرکردنی کاتیی دوو مانگی بۆ دەرکردووە.
لە دەقی ئەم بڕیارەدا، ئارشیا قەیسەربەیگی بە پشتبەستن بەو دانپێدانانانەی کە لەژێر گوشاردا لێی وەرگیراون، لەگەڵ تۆمەتگەلێکی وەک «مۆحارەبە» (دژایەتی خودا)، «ئەفساد فیئەرز» (گەندەڵی لەسەر زەوی)، «نواندنی هێز بە چەک»، «کڕین، ڕاگرتن و هەڵگرتنی نایاسایی تەقەمەنی جەنگی» و «تەقەکردنی نایاسایی» ڕووبەڕوو کراوەتەوە؛ ئەو تۆمەتانەی کە لە ئەگەری دەرچوونی حوکمی مەحکوومییەتدا، دەتوانن سزای لەسێدارەدانیان لێبکەوێتەوە.
ئەمە لە کاتێکدایە کە بەرپرسی دادوەری لە دەقی بڕیاری دەستبەسەرکردنەکەدا بانگەشەی ئەوەی کردووە کە وتەکانی تۆمەتبار لە دۆخی «تەندروستی و سەلامەتیدا» وەرگیراون و مافی تانەدان لە بڕیارەکەش بە وی ڕاگەیەندراوە؛ بانگەشەیەک کە لەگەڵ ئەو بەڵگانەی لەسەر شوێنەواری ئەشکەنجە، شکانە فرەکان و بەردەوامیی گوشارە جەستەیی و دەروونییەکان بۆ سەر ئەو لە ماوەی دەستبەسەرکردنیدا، لە دژایەتییەکی ئاشکرادایە.
ڕێکخراوی مافی مرۆڤی هانا لە کاتێکدا نیگەرانیی قووڵی خۆی بەرامبەر بە مەترسیی جیددی لەسەر پێشێلکردنی مافی ژیان و ئەگەری دەرچوونی حوکمی لەسێدارەدان لەسەر بنەمای دانپێدانانی زۆرەملێ دەردەبڕێت، جەخت دەکاتەوە کە بەردەوامیی ڕاگرتنی ئارشیا قەیسەربەیگی لە ژووری تاکەکەسیدا، بێبەشکردنی لە دەستڕاگەیشتن بە پارێزەر و خزمەتگوزاریی دەرمانی، و وەرگرتنی دانپێدانان لەژێر ئەشکەنجەدا، پێشێلکردنی ئاشکرای بنەما سەرەتاییەکانی دادگاییکردنی دادپەروەرانە و بەڵێنە نێودەوڵەتییەکانی کۆماری ئیسلامیی ئێرانە لەژێر چاودێریی پەیماننامەی نێودەوڵەتیی مافە مەدەنی و سیاسییەکان و پەیماننامەی قەدەغەکردنی ئەشکەنجە. هانا داوای دەستێوەردانی بەپەلەی دامەزراوە نێودەوڵەتییەکانی مافی مرۆڤ، ئەنجامدانی چاودێریی سەربەخۆ بەسەر دۆخی ناوبراو و گەرەنتیی ڕاگرتنی هەر جۆرە ئەشکەنجە، گوشاری ئەمنی و ڕەوتی دادوەریی پشتبەستوو بە دانپێدانانی زۆرەملێ دەکات.