سێ هاووڵاتیی خەڵکی شنۆ بە ناوەکانی فەرهاد ئیبراهیمزادە، قادر باریکی و جەعفەر باریکی، ڕۆژی دووشەممە ٢٥ی جۆزەردانی ١٤٠٥ لەلایەن هێزە ئەمنییەکانەوە دەستبەسەر کراون و تا ئێستا هیچ زانیارییەک لەسەر چارەنووس و شوێنی ڕاگرتنیان لەبەر دەستدا نییە.
بەپێی ئەو زانیارییانەی کە گەیشتوونەتە ڕێکخراوی مافی مرۆڤی هانا، بنەماڵەی ئەم کەسانە لە ماوەی ڕۆژانی ڕابردوودا نەیانتوانیوە هیچ زانیارییەک سەبارەت بە دۆخی ئەوان بەدەست بهێنن. هەروەها دامەزراوە ئەمنی و دادوەرییەکان تا ئێستا هیچ ڕوونکردنەوەیەکیان سەبارەت بە هۆکاری دەستبەسەرکردن، تۆمەتە ئەگەرییەکان یان شوێنی گواستنەوەی ئەم هاووڵاتییانە نەداوە.
فەرهاد ئیبراهیمزادە خەڵکی گوندی «کانیڕەش»ە و قادر و جەعفەر باریکی، دوو بران و خەڵکی گوندی «قەڵاتیان»ی سەر بە شارستانی شنۆن.
بەپێی ڕاپۆرتە گەیشتووەکان، ئەم سێ هاووڵاتییە لە کاتی دەستبەسەرکردنیانەوە تا ئێستا، لە مافی دەستڕاگەیشتن بە پارێزەر و پەیوەندیگرتن یان چاوپێکەوتن لەگەڵ ئەندامانی بنەماڵەکەیان بێبەش کراون، ئەمەش نیگەرانییەکانی لەسەر دۆخی ئەوان زیاتر کردووە.
ڕێکخراوی مافی مرۆڤی هانا هاوکات لەگەڵ دەربڕینی نیگەرانیی خۆی بەرامبەر بە بەردەوامیی بێخەبەری لە دۆخی ئەم هاووڵاتییانە، جەخت دەکاتەوە کە ڕاگرتنی کەسانی دەستبەسەرکراو لە دۆخێکدا کە بنەماڵەکانیان لە چارەنووس و شوێنی ڕاگرتنیان بێئاگان و دەرفەتی دەستڕاگەیشتن بە پارێزەریش بۆیان دابین نەکراوە، لەگەڵ بنەماکانی دادگاییکردنی دادپەروەرانە و دەستەبەرکردنی مافە سەرەتاییەکانی کەسانی دەستبەسەرکراو ناکۆکە. بەردەوامیی دۆخێکی لەو شێوەیە دەکرێت ڕێگە خۆش کات بۆ دەستبەسەرکردنی سەرەڕۆیانە و پێشێلکردنی زیاتری مافەکانی ئەو کەسانە لە ماوەی دەستبەسەریدا.