بە گوێرەی زانیاریەکانی رێکخراوی مافی مرۆڤی هانا: زیاتر لە ١٣ ڕۆژە شارۆمەندێک بە ناوی محەمەد رەشیدزادە خەڵکی شاری بانە بە شێوەی سەرەڕۆیانە دەستبەسەر کراوە بەڵام تا ئێستا هیچ زانیاریەک لە سەر چارەنوسی لە بەدەستدا نیە و ئەم دوخەش نیگەرانی قوڵی بنەماڵە و کەسوکاری ئەم شارۆمەندەی لێکەوتووەتەوە.
بە گوتەی سەرچاوەیەکی ئاگادار، محەمەد رەشیدزادە لەگەڵ شارۆمەندێکی تر بە ناوی مستەفا قوسی خەڵکی بانە، ڕۆژی چوارشەممە ٢١ی خەزەڵوەری ١٤٠٤(١٢ی نۆڤەمبەری ٢٠٢٥) لە ڕێگای پیرانشارـــ مەهاباد لە لایەن هێزە ئەمنییەکانەوە دەستبەسەر و پاشان بۆ گرتووخانەی ئیدارەی ئیتڵاعاتی شاری ورمێ ڕاگوێزراون.
ئەم سەرچاوەیە زیادی کرد، بەدواداچوونی بەردەوامی بنەماڵەی ئەم شارۆمەندە بە مەبەستی ئاگادار بوونیان لە بارودۆخ و چارەنوسی هیچ ئەنجامێکی نەبووە و لە لایەن بەرپرسانی دامودەزگا ئەمنییەکانەوە هیچ جۆرە وڵامێکیان پێنەدراوەتەوە.
شایانی باسە محەمەد رەشیدزادە لە کاتی دەستبەسەرکرانیەوە تا ئێستا لە سەرجەم مافەکانی لەوانەش پەیوەندی لەگەڵ بنەماڵە و وەرگرتنی پارێزەر، بێبەش کراوە.