بەپێی زانیاریی گەیشتوو بە ڕێکخراوی مافی مرۆڤی هانا، نەرمین محەممەدی، ژنی تەمەن ٢٤ ساڵانی خەڵکی گوندی «بەردەسپی» لە ناوچەی ساڕاڵی سەر بە دیواندەرە و دانیشتووی شارۆچکەی نایسەری سنە، ئێوارەی پێنجشەممە ١٦ی ڕەزبەری ١٤٠٥، لە هەلومەرجێکی نادیاردا گیانی لەدەست داوە.
نەرمین نزیکەی پێنج ساڵ لەمەوبەر لەگەڵ یەکێک لە خزمەکانی خۆی هاوسەرگیریی کردبوو. بەپێی زانیارییە سەرەتایییەکان، سەبارەت بە چۆنیەتیی گیان لەدەستدانی، گێڕانەوەی جیاواز هاتوونەتە ئاراوە. لە کاتێکدا هەندێک لە زانیارییە وەرگیراوەکان باس لە ئەگەری گیان لەدەستدان بەهۆی خۆهەڵواسینەوە دەکەن، گێڕانەوەیەکی تر کە دەدرێتە پاڵ کەسوکاری هەردوو بنەماڵەکە، هۆکاری گیان لەدەستدانەکەی بۆ کەوتنەخوارەوە لە پلیکانەکان گەڕاندووەتەوە.
لەو زانیارییانەی دراونەتە هانا هەروەها هاتووە کە شوێنی ئاماژەپێکراو پەیژەیەکی کورتی سێ پلیکانەیی بووە و هەر ئەم بابەتەش گومانی لەسەر گێڕانەوەی کەوتنەخوارەوە دروست کردووە. لەگەڵ ئەوەشدا، بەرزیی پەیژەکە یان شێوازی وەسفکردنی شوێنی ڕووداوەکە بەتەنیا بەس نییە بۆ ڕەتکردنەوە یان پشتڕاستکردنەوەی هیچ کام لە گێڕانەوەکان. دیاری کردنی هۆکاری گیان لەدەستدان پێویستی بە پشکنینی شوێنی ڕووداوەکە، جۆر و شوێنی برین و زیانە جەستەیییەکان، پشکنینی پزیشکیی دادوەری و بەراوردکردنی دۆزینەوە پسپۆڕییەکان لەگەڵ وتەی کەسانی ئاگادار هەیە.
لە ڕوانگەی یاسایییەوە، تا پێش تەواوبوونی لێکۆڵینەوەکان، ناکرێت گیان لەدەستدانی نەرمین وەک خۆکوژی، ڕووداو یان کوشتن لەقەڵەم بدرێت. هەروەها ئەگەری دەستێوەردانی کەسانی دیکە، لەوانەش لە نێو خێزاندا، دەبێت لە چوارچێوەی لێکۆڵینەوە تاوانکارییەکاندا بپشکنرێت، بەبێ ئەوەی تەنیا پەیوەندیی خێزانی بکرێتە بنەمای خستنەپاڵی تۆمەت. لەم چەشنە دۆسییانەدا، تاوتوێکردنی پێشینەی ئەگەریی توندوتیژیی خێزانی، ناکۆکی و هەڕەشەکانی پێشوو، بەشێکە لە لێکۆڵینەوە پێویستەکان بۆ ڕوونکردنەوەی هەلومەرجی ڕوودانی مەرگەکە.
ڕێکخراوی مافی مرۆڤی هانا هاوکات لەگەڵ دەربڕینی نیگەرانی سەبارەت بە ناڕوونییەکانی ئەم دۆسیەیە، داوای بەدواداچوونی بەپەلە، سەربەخۆ و کاریگەر لەلایەن دەسەڵاتی دادوەری و پزیشکی دادوەرییەوە دەکات.
هانا جەخت لەوە دەکاتەوە کە پەسەندکردنی بەپەلەی هەرکام لە گێڕانەوەکان، بەبێ تاوتوێکردنی بەڵگە و شایەتەکان، دەکرێت ببێتە هۆی پێشێلبوونی مافی دادخوازی و ئەگەری دەربازبوونی تۆمەتبارانی تاوان لە لێپرسینەوە. ڕوونکردنەوەی هۆکاری گیان لەدەستدانی نەرمین محەممەدی و لێکۆڵینەوە لە هەموو ئەگەرەکان، لەوانەش ڕوودانی توندوتیژی دژی ژنان، پێویستی بە لێکۆڵینەوەیەکی بێلایەنانە و بەڵگەمەند هەیە.