بە پێی ڕاپۆرتی گەشتوو بە رێکخراوی مافی مرۆڤی هانا: ڕۆژی پێنج شەممە ٢٩ی خەزەڵوەری ١٤٠٤ (٢٠ی نۆڤەمبەری ٢٠٢٥) کرێکارێک بە ناوی یەدوڵڵا قادریان باوکی منداڵێک، خەڵکی شاری قوروە، لە کاتی کار لە کارخانەی پاڵاوتنی ڕۆن لە شەهرەکی سەنعەتی ئاوانگان بە هۆی نەبوونی ئەمنیەتی شوێنی کار، کەوتووەتە ناو مەخزەنی پاڵاوتنی ڕۆن کە قوڵاییەکەی پێنج مەتر بووە و گیانی لە دەستداوە.
شایانی باسە لە ساڵانی ڕابردوودا بە هۆکاری کەمتەرخەمی خاوەنکاران و دامەزراوە چاوەدێرەکان وە هەروەها نەبوونی کەرستەی پارێزوار لە شوێنی کار، ئاماری ڕووداوی کار و گیانلەدەستدانی کرێکاران لە کوردستان و ئێران بە شێوەیەکی بەرچاو زیادی کردووە.