بەپێی ڕاپۆرتی گەیشتوو بە رێکخراوی مافی مرۆڤی هانا: لە ڕۆژانی ڕابردوو شارۆمەندێکی کورد بە ناوی “شەهاب توان” خەڵکی ئاوایی ئیبراهیماوای سەر بە میاندواو، لە لایەن لقی ١٠١ی دادگای کەیفەری دوویی ئەم شارەوە سزای سێ مانگ و یەک ڕۆژ بەندکرانی بە سەردا سەپێندراوە.
بە پێی ئەم ڕاپۆرتە، ئەم شارۆمەندە کوردە بە سەرۆکایەتی قازی “وەلایی” بە تۆمەتی پڕوپاگەندە لە دژی نیزام و ئامادە بوونی لە ڕێورەسمی ئەسپەردەکردنی دایکی چەند کەس لە گیانبەختکردووان و گفتوگۆ لەگەڵ چالاکێکی سیاسی لە دەرەوەی وڵات سزای سێ مانگ و یەک ڕۆژ بەندکرانی بە سەردا سەپێندراوە.
شایانی باسە شەهاب توان، سەر لە بەیانی ڕۆژی یەکشەممە ٥ی ڕەشەمەی ١٤٠٣، لە لایەن هێزە ئەمنییەکانەوە لە میاندواو بە شێوەی سەرەڕۆیانە لە ماڵەکەی دەستبەسەر کرا و دوای مانگێک بەندیخانەی ورمێ ڕاگوێزرا و دواتر بە دانانی بارمتە بە شێوەی کاتی ئازاد کرابوو.