بە پێی دوایین پێشهاتەکانی ئەو داوایەی کە سێ ڕزگاربووی ئەشکەنجە لە ئێران لە دژی پەرویز سابتی لە بەڕێوەبەرانی باڵای پێشووی ساواک تۆماریان کرد، دادگای فیدراڵی لە فلۆریدا ڕێگەی داوە کە سەرەڕای تێپەڕبوونی نزیکەی نیو سەدە بەسەر ئەو ڕووداوانەی کە باسی لێوە دەکرێت دۆسیەکە بەردەوام بێت.
بڵاوبوونەوەی وەشانێکی وردی بڕیارەکەی دادگا وردەکاری نوێی دۆسیەکە، لەوانە نیگەرانییە ئەمنییەکانی سکاڵاکاران و ئەگەری پەیوەندییەکانی نێوان هەندێک کەسایەتی ساواک و دەزگای ئیتڵاعاتیی کۆماری ئیسلامی ئاشکرا کردووە.
لە بەشێکی ئەو بڕیارەدا، دادگا بە ئاماژەدان بە بەڵگەنامە و شایەتی پێشکەشکراو، باس لە کەڵک وەرگرتن لە هەندێک هێز و پێکهاتەکانی پێشووی ساواک لە لایەن ئیتلاعاتی کۆماری ئیسلامییەوە کرد. هەروەها سکاڵاکاران کۆمەڵێک بەڵگەیان سەبارەت بە ئەگەری پەیوەندییە سابتی لەگەڵ دامەزراوەکان لەگەڵ هەندێک بازنەی هەواڵگری خستۆتەڕوو، کە دادگا لە پشکنینی هۆکارەکانی دواکەوتنی تۆمارکردنی سکاڵاکەدا لەبەرچاوی گرتووە.
پرسێکی دیکەی گرنگ ئەو هەڕەشەیانەیە کە لە دژی سکاڵاکاران و پارێزەرەکانیان ڕاپۆر کراوە. بە سەرنجدان بە هەڕەشەکان و نیگەرانی لە تۆڵەسەندنەوە، دادگا ڕێوشوێنی تایبەتی پاراستنی گرتووەتەبەر و ناسنامەی داواکارانی بە نهێنی هێشتووەتەوە.
لە ٦ی ئۆکتۆبەری ٢٠٢٦، دادگا داواکارییەکەی سابتی بۆ داخستنی دۆسیەکە بە هۆی تێپەڕبوونی کات ڕەتکردەوە. بڕیارەکە ترسی بنەمادار لە تۆڵەسەندنەوە و سەختی ناسینەوەی شوێنی نیشتەجێبوونی سابتی وەک بارودۆخێکی ناوازە و کاریگەر لە ڕاگرتنی وادەی یاسایی ناساند. هەروەها وەشانێکی گشتی و تێبینیکراوی بڕیارەکە لە ٢٧ی ئۆکتۆبەر بڵاوکرایەوە.
ئەم بڕیارە هێشتا بە مانای سەلماندنی بەرپرسیارێتیی سەلمێنراو لە ئەشکەنجەدان یان پشتڕاستکردنەوەی یەکلاکەرەوەی پەیوەندی سابتی بە دەزگا ئیتلاعاتییەکانی کۆماری ئیسلامییەوە نییە، بەڵکو ڕێگە بە کراوەیی بۆ پێداچوونەوەی قەزایی بە داواکارییەکانی سکاڵاکاران دەهێڵێتەوە.
ڕێکخراوی مافی مرۆڤی هانا جەخت لەسەر گرنگی ئەم پەرەسەندنە قەزاییە دەکاتەوە و وەبیردەهێنێتەوە کە تێپەڕبوونی کات نابێت ببێتە بەربەست لەبەردەم قوربانیانی ئەشکەنجەدان بۆ ئەوەی بەدوای دادپەروەریدا بگەڕێن. گرنگی ئەم کەیسە لەوەدایە کە تەنانەت دوای نزیکەی پەنجا ساڵ، هێشتا دەتوانرێت مامەڵە لەگەڵ ئیدیعاکانی ئەشکەنجەدان بکرێت و داوای لێپرسینەوە بکرێت، بەبێ گوێدانە ئەوەی ئەو کەسانەی کە تاوانبارە ئەگەرییەکان پەیوەندییان بە کام پێکهاتەی سیاسی یان ئەمنیەوە هەبووە.