بەپێی ئەو زانیارییانەی بڵاو کراونەتەوە، لە ماوەی ڕۆژانی یەکشەممە و دووشەممە، ١ و ٢ی خەرمانانی ١٤٠٥ی هەتاوی، «سەنعان فەراستی» و «ڕەحمان ئازەرەخەش»، دوو هاووڵاتیی خەڵکی شنۆ، لەلایەن هێزەکانی ئیدارەی ئیتلاعاتەوە دەستبەسەر کران.
بە هەژمارکردنی دەستبەسەرکردنی ئەم دوو کەسە، ژمارەی ئەو هاووڵاتییانەی لە ماوەی چەند ڕۆژی ڕابردوودا لە شنۆ دەستبەسەر کراون گەیشتە لانیکەم چوار کەس.
سەنعان فەراستی ڕۆژی یەکشەممە ١ی خەرمانان لەلایەن هێزەکانی ئیدارەی ئیتلاعاتەوە دەستبەسەر کرا. بەرەبەیانی ڕۆژی دواتر، ڕەحمان ئازەرەخەش، هاووڵاتیی تەمەن ٤٩ ساڵی خەڵکی گوندی «سۆفیان»ی سەر بە شنۆ، کاتژمێر چواری بەیانی دوای هێرشی هێزەکانی ئیدارەی ئیتلاعات بۆ سەر ماڵەکەی دەستبەسەر کرا.
بەپێی ڕاپۆرتەکان، شێوازی چوونە نێو ماڵ و دەستبەسەرکردنی ناوبراو لەگەڵ دروستکردنی کەشێکی ترس و تۆقاندندا بووە.
ڕێکخراوی مافی مرۆڤی هانا پێشتر هەواڵی دەستبەسەرکردنی «سەعدوون داستان» و «مەولوود ڕووستا»، دوو هاووڵاتیی خەڵکی گوندی «حەسەن نووران»ی شنۆی، بڵاو کردبووەوە. مەولوود ڕووستا چەند کاتژمێرێک دوای دەستبەسەرکردنی بە دانانی بارمتە ئازاد کرا، بەڵام بەپێی دوایین زانیارییەکان، سەعدوون داستان هێشتا لە دەستبەسەریدا ماوەتەوە.
تا کاتی بڵاوکردنەوەی ئەم ڕاپۆرتە، هیچ زانیارییەک لەسەر هۆکارەکانی دەستبەسەرکردن، تۆمەتە ئەگەرییەکان و شوێنی ڕاگرتنی سەنعان فەراستی و ڕەحمان ئازەرەخەش لەبەردەستدا نییە و بەدواداچوونی بنەماڵەکانیان بۆ ئاگاداربوون لە دۆخیان تا ئێستا بێئەنجام ماوەتەوە.