بە پێی راپۆرتێک کە ئەمڕۆ یەکشەممە رێکەوتی ١٩ی رێبەندانی ١٣٩٩ بەرامبەر ٧ی فێبرواری ٢٠٢١ بە تۆڕی نێونەتەوەیی مافی مرۆڤی کوردستانی ئێران گەیشتووە کچە شاعیر و چیرۆک نووسی تازەلاوی مەریوانی “ئارەزوو مستەفایی” ناسراو بە “هەنسک” کە لە لایەن ناوەندە ئەمنییەتییەکانی رژیمەوە دەستبەسەر کرابوو، دوای ئەشکەنجە و ئازاری زۆر پاش وەرگرتنی بەڵێننامە ئازادیان کردووە.
ئارەزوو مستەفایی (هەنسک) شاعیرە و خەڵکی مەریوانە و بە هۆی نووسینی شیعرگەلێک لە سەر کوردستان و بەشداری لە بەرنامەی تلویزیۆنیدا، رۆژی پێنجشەممە رێکەوتی ١٦ی رێبەندانی ٩٩ دەستبەسەر کراوە و دوای ٣ رۆژ ئەشکەنجە و ئازار ئەمڕۆ ١٩ی رێبەندان ئازاد کراوە. سەرچاوەکانی ئاگادار، لەم بارەوە رایانگەیاندووە ناوبراو لە ماوەی دەسبەسەر کردنیدا رووبەڕووی تووندوتیژی بووتەوە و ئاسەواری ئەشکەنجەی بە لەشەوە ماوە.
شایانی باسە مەئمورانی ئەمنییەتی لە مەریوان لە رۆژانی رابردوودا دەیان کەس لە شارۆمەندانی ئەو شارەیان گرتووە و لێپێچینەوەیان لەگەڵ کردوون و ئازاریان داون. وەک نموونە دەکرێ ئاماژە بە "مەنسوور وەلیپوور" بکەین کە یەکێکی ترە لە دەستبەسەرکراوەکان و ئازار و ئەشکەنجەی زۆر دراوە.