هانا: رۆژی شەممە ٢٧ی خاکەلێوەی ١٤٠١ – (١٦ی ئاپریلی ٢٠٢٢)، هێزە ئەمنییەکانی حکومەتی ئیسلامی ئێران چوار شارۆمەندیان دەستبەسەر کردووە.
هاوکارانی هانا لە راپۆرتێکدا ناسنامەی ئەم شارۆمەندانەیان بەم جۆرە راگەیاندووە:
١ . عومەر ئیبراهیم نادری
٢ . لەیلا ئیبراهیم نادری
٣ . سەید ناسر حسێنی
٤ . شەهرام بۆرکە
بەپێی ئەم راپۆرتە، ئەم شارۆمەندانە خەڵکی ئاوایی "سوغانلوو" لە ناوچەی پیرانشارن و بە بێ بەڵگەی یاسایی و بە شێوەی سەرەڕۆیانە لەلایەن هێزە ئەمنییەکانی حکومەتەوە دەستبەسەر کراون و بۆ لێپرسینەوە رەوانەی گرتووخانەی ئیتلاعاتی سپا لە پیرانشار کراون. لە درێژەی راپۆرتەکەدا هاتووە، پاش لێپرسینەوە "لەیلا ئیبراهیم نادری" گوازراوەتەوە بۆ بەندی ژنانی بەندیخانەی ورمێ و "شەهرام بۆرکە" بۆ بەندیخانەی نەغەدە بەڕێ کراوە.
بەپێی ئەم هەواڵە، رۆژی دووشەممە ٢٩ی خاکەلێوەی ١٤٠١ – (١٨ی ئاپریلی ٢٠٢٢)، لەیلا ئیبراهیم نادری، عومەر ئیبراهیم نادری و ناسر حسێنی بە مەرجی نووسینی بەڵێننامە ئازاد کراون بەڵام شەهرام بۆرکە هێشتا لە بەندیخانەی ناوەندیی نەغەدە دەستبەسەرە.