هانا: رۆژی پێنجشەممە ٣ی پووشپەڕی ١٤٠٠ – (٢٤ی ژوئەنی ٢٠٢١)، لاوێکی کورد بە تەقەی هێزە چەکدارەکانی حکومەتی ئیسلامی ئێران لە بەرزاییەکانی سنووری “سوورێن” پێکرا و گیانی لەدەستدا.
ناسنامەی ئەم شارۆمەندە کوردە "محەممەد مینوویی" تەمەن ٢٩ ساڵ و خەڵکی ئاوایی "ئەسکۆڵ" لە ناوچەی مەریوان راگەیەندراوە.
شایانی باسە ناوبراو شوان بووە و لە لەوەڕگەکانی ئەوێ خەریکی لەوەڕاندنی مەڕوماڵات بووە و هێزە چەکدارەکانی حکومەتی ئێران بە بێ هیچ هۆکارێک تەقەیان لێ کردووە و کوشتوویانە. دواتر تەرمی "محەممەد مینوویی" رەوانەی نەخۆشخانەی فەجری مەریوان کرابوو.
لەم پێوەندییەدا پێویستە ئاماژە بە بەندەکانی ٣ و ٥ی جاڕنامەی جیهانی مافەکانی مرۆڤ بکەین کە حکومەتی ئیسلامی ئێرانیش واژۆی کردووە بەڵام بە بەردەوامی پێشێلی دەکا.
بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە.
بەندی ٥- هیچ کەس نابێ ئەشکەنجە بدرێ یان بکەوێتە بەر کردەوە و رەفتار و سزای زۆردارانە و دژی ئینسانی و سووکایەتی پێ بکرێ.