هانا: شەوی رابردوو شەممە لە سەر یەکشەممە ١٨ی گوڵانی ١٤٠٠ – (٨ی مەی ٢٠٢١)، هێزە چەکدارەکانی حکومەتی ئیسلامی ئێران هەڵیانکوتا سەر چالاکێکی مەدەنی بە ناوی “عەلی ئەڵڵاوەیسی” خەڵکی سنە و دەستبەسەریان کرد.
"عەلی ئەڵڵاوەیسی" خەڵکی سنەیە و یەکێک لە چالاکانی مەدەنی و پارێزەری مافی دەسفرۆش و دەستگێڕەکانە لە کوردستان. شەوی رابردوو هێزە چەکدارەکانی حکومەت هێرشیان کردە سەر ماڵەکەی و ناوبراویان قۆڵبەست کردوو و دەستیان بەسەر کەلوپەلەکانی داگرت و لەگەڵ خۆیان بردیان.
ناوبراو پێشتریش لەلایەن هێزە ئەمنییەکانەوە هەڕەشەی لێ کرابوو و زەخت و گوشاری زۆری لەسەر بوو.
جێگای ئاماژەیە "عەلی ئەڵڵاوەیسی" خاوەنی منداڵێکی خاوەنپێداویستییە و بۆ دابینکردنی دەرمانی مناڵەکەی و بژیوی ژیانی بنەماڵەکەی خەریکی دەستگێڕی و دەسفرۆشی بوو.
جێگای ئاماژەیە بەندەکانی ٣، ٩، ١٩ی جاڕنامەی جیهانی مافەکانی مرۆڤ ئاوا دەڵی:
بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە.
بەندی ٩- هیچ کەس نابێ سەرەڕۆیانە دەستبەسەر، زیندانی یا شاربەدەر بکرێ.
بەندی ١٩- هەر تاکێکی کۆمەڵگا مافی ئازادی بیروڕا و دەربڕینی ئازادانەی بیروڕای خۆی هەیە و ئەم مافەش پێویستی بەمەیە هیچ کەس لەبەر ئەوەی بیروبۆچوونێکی هەیە نەترسێ و لە وەدیهێنان و وەرگرتن و بڵاوکردنەوەی زانیاری و بیروبۆچووندا نیگەران نەبێ و ئازادانە و بێ ترس و بێ لەبەرچاوگرتنی تێبینییە سنووردارەکان دەستی بە هەموو ئامرازێکی گونجاو بۆ دەربڕینی بیروڕای خۆی و بڵاوکردنەوەی رابگا.
هەروەها بە پێی ئەم جاڕنامەیە هەر تۆمەت لێدراو یا تاوان لێدراوێک مافی هەبوونی پارێزەر و مافی دەستڕاگەیشتن بە دادگایەکی بێ لایەن و دادپەروەری هەیە.
لەم کەیسەدا بە ئاشکرا دەردەکەوی حکومەتی ئیسلامی ئێران و دامودەزگا ئەمنییەتی و قەزاییەکانی هەموو ئەم بەندانەی جاڕنامەی جیهانی مافەکانی مرۆڤی پێشێل کردووە. ئەوە لە حاڵێکدایە وڵاتی ئێران یەکێکە لەو وڵاتانەی ئەم جاڕنامەیەی واژۆ کردووە.