رۆیا حوسێن نژاد کچی زیندانی سیاسی کورد “حەمید حوسێن نژاد حەیدەرانلو” بە بڵاو کردنەوەی ڤیدیۆیەک بە ئاماژەدان بە ساڵێک ناڕونی بارودۆخ و نادیاری چارەنوسی باوکی ، داوای پشتیوانی سەرجەم خەڵکی ئێران ، رێکخراوە نێودەوڵەتیەکان و چالاکان و رێکخراوەکانی مافی مرۆڤ لە باوکی دەکات .
لە ڤیدیۆکەدا رۆیا حوسێن نژاد باس لەوە دەکات کە لە کاتی پێکدادانەکە لە ناوچەی ماکۆ و چاڵدران ئەو لەگەڵ بنەماڵەکەی لە تورکیا بووە و مۆری چوونە دەرەوە و چوونە ژوورەوەی گومرکی بازرگان لە پاساپۆرتەکانیان و هەروەها ئانتێنی سیمکارتی باوکی لەو رێکەوتە بوونیان لە تورکیا دەسەلمێنێت .
بەم حاڵەشەوە باوکی کە خوێنەواریشی نیە ماوەی ١١ مانگ و ١٠ ڕۆژ لە گرتنگە ئەمنییەتیەکاندا ئەشکەنجە و ناچار بە دانپێدانانی زۆرە ملێ کراوە . دانپێدانانێک کە پارێزەرەکانیان سەلماندوویانە ناڕاستن ، بەڵام دەسەڵاتی دادوەری کۆماری ئیسلامی نایهەوێت ڕاستیەکان قەبوڵ بکات . رۆیا حوسێن نژاد داوا لە دامەزراوە نێودەوڵەتیەکان و خاتوو دوکتۆر مای ساتو دەکات ڕێگا نەدەن باوکی بێ تاوانی لە سێدارە بدرێت .
شایانی باسە سزای سێدارەی “حەمید حوسێن نژاد حەیدەرانلو” لە لقی ٩ی دادگای باڵای وڵات پشتڕاست کراوەتەوە و سزاکە ڕۆژی چوارشەممە ٦ی خاکەلێوەی ١٤٠٤، بەم بەندکراوە سیاسیە کوردە لە بەندیخانەی ناوەندی ورمێ ڕاگەینراوە .
حەمید حسێن نژاد حەیدەرانلو بەندکراوی سیاسی تەمەن ٣٩ ساڵ ، خێزاندار ، باوکی سێ منداڵ و خەڵکی ئاوایی “سگریک”ی سەر بە شاری چاڵدرانە .
ناوبراو بۆ ماوەی ١١ مانگ و ١٠ ڕۆژ لە گرتنگەی ئیدارەی ئیتڵاعات ڕاگیرا و لە ژێر قورسترین ئەشکەنجەی جسمی و ڕۆحیدا بوو بە مەبەستی ئەوەی دانپێدانانی زۆرەملێی لێوەربگیرێت کە بەشداری کردووە لە پێکدادانێکی سەربازی لە نێوان هێزەکانی پارتی کرێکارانی کوردستان pkk و هێزەکانی پاسەوانی سنوور کە ببووە هۆی کوژرانی ٨ کەس لە هێزەکانی پاسەوانی سنوور .
ئەم بەندکراوە سیاسیە کوردە بۆ وەرگرتنی دانپێدانانی زۆرەملێ ماوەی ٨ مانک بە توندترین شێوە لە لایەن لێکۆڵەرانی ئەمنییەتیەوە ئەشکەنجە کرا و تەنانەت لە لایەن کەسێک بە ناوەی ئەستیری کە لێکۆڵەری دۆسیەکەی بوو ئەشکەجە درابوو .ئەو لە ژێر ئەم ئەشکەنجە قورسانەدا ناچار بە دانپێدانانی زۆرەملێ کرا و لە حاڵێکدا کە خوێنەواریشی نەبوو ناچار کرا ئەو نوسراوە و بەڵگەنامانە واژۆ بکات کە پێشتر لە لایەن لێکۆڵەرە ئەمنییەتیەکانەوە ئامادە کرابوون .
ناوبراو لە کۆتاییەکانی مانگی پوشپەڕی ساڵی ١٤٠٣، لە لایەن لقی یەکی دادگای شۆڕشی ئیسلامی ورمێ بە سەرۆکایەتی قازی “نەجەفزادە” بە تۆمەتی “بەغی” لە رێگای ئەندامێتی لە پارتی کرێکارانی کوردستان pkk ، سزای لە سێدارەدانی بە سەردا سەپێنرا.ئەم بەندکراوە سیاسیە لە ئێستادا لە بەندی پەزیرشی ٢ی بەندیخانەی ورمێ ڕاگیراوە .
ئەم بەندکراوە سیاسیە لە ماوەی دەستبەسەر بوونیدا تەنیا دوو جار توانیویەتی پەیوەندی تەلەفۆنی کورت ماوەی لەگەڵ بنەماڵەکەی هەبێت و لە مافی دەستپێراگەیشتن بە پارێزەر و چاوپێکەوتن لەگەڵ بنەماڵەکەی بێبەش بووە .