هێمن ئامان تەمەن ۲٦ ساڵ، خەڵکی ئاوایی “قورمیش” و دانیشتووی شاری بۆکان، لە جەریانی ناڕەزایەتیە سەرتاسەریەکان دژی قەتڵی حکومەتی ژینا ئەمینی بە تەقەی ڕاستەوخۆی ۱٨۰ فیشەک ساچمەی لە لایەن هێزە سەرکوتگەرەکانی کۆماری ئیسلامی ئێرانەوە بە سەختی بریندار بوو وە لە ڕێکەوتی ۲۷ی خەزەڵوەری ۱٤۰۱، لە ماڵەکەی لە لایەن هێزە ئەمنیەکانەوە بە لێدان و بەکارهێنانی توندوتیژی دەستبەسەرکرا.
دواتر لە یەکێک لە گرتووخانە ئەمنیەکانی کۆماری ئیسلامی ئێرانەوە بە هۆی ئەشکەنجە لە ڕێکەوتی ۲ی سەرماوەزی ۱٤۰۱، کوژرا.
ئیدارەی ئیتڵاعاتی کۆماری ئیسلامی ئێران ، لە شاری بۆکان، لە ڕێکەوتی ۲ی سەرماوەزی ۱٤۰۱ لە ڕێگای پەیوەندیەکی تەلەفۆنیەوە باوکی هێمن ئامانی بانگ کرد و هێزە ئەمنیەکان گواستیانەوە بۆ ورمێ و تەرمی هێمنیان ڕادەستی باوکی کرد.
شایانی باسە ڕێورەسمی ئەسپەردەکردنی تەرمی هێمن ئامان لە ژێر چاودێری توندی ئەمنی بەڕێوەچوو و بنەماڵەکەی بە بێ گوێدانە هەڕەشەی هێزە سەرکوتگەرەکان ڕێوڕەسمی بە خاک سپاردنیان بۆ هێمن بەڕێوەبرد.
