بە پێی ڕاپۆرتی گەیشتوو بە ڕێکخراوی مافی مرۆڤی هانا: ڕۆژی شەممە ۱۰ی خەزەڵوەری ۱٤۰٤،(١ی نوامبری ۲۰۲٥) کرێکارێکی خەڵکی بوکان بە ناوی “سەید تاهیر دادوەر” بە هۆی کەوتنەخوارەوەی ئامێرکی لیفتراک لە کارگەیەکی بۆری پلی ئیتیلن لە شەهرەکی سەنعەتی بوکان، گیانی لەدەستداوە.
بە پێی ئەم ڕاپۆرتە، ناوبراو تەنیا ٢٠ ڕۆژی مابوو بۆ خانەنشین بوونی.
هەروەها لە هەمان ڕۆژدا، کرێکارێکی دیکە بە ناوی موحسێن کاکەڕەشی بە هۆی کەوتنە خوارەوە لە سەر جەرسەقیلی سەقفی لە یەکێک لە کارگاکانی شەهرەکی سەنعەتی بوکان، تۆشی ڕووداوێک بوو و گیانی لەدەستداوە.
شایانی باسە لە ساڵانی ڕابردوودا بەهۆی نەبوونی سەلامەتی شوێنی کار و بێبایەخی خاوەنکارەکان لە ئاست بنەماکانی سەلامەتی و پاراستن، ژمارەی ڕووداوەکانی شوێنی کار لە کوردستان و ناوچەکانی دیکەی ئێران لە هەڵکشاندایە. بەپێی ڕێکەوتن و ستانداردە نێودەوڵەتییەکانی مافی مرۆڤ و یاسای کار، حکومەتەکان پابەندن بە دڵنیابوون لە تەندروستی و سەلامەتی کرێکاران لە شوێنی کاردا.