بەپێی ڕاپۆرتی گەیشتوو بە ڕێکخراوی مافی مرۆڤی هانا : لە چەند ڕۆژی ڕابردوودا لە شاری جوانڕۆ ، ژنێکی تەمەن ٢٥ ساڵ بە ناوی “مێهری” کچی ئەحمەد ، خەڵکی ئاوایی “یاری”، لەلایەن هاوسەرەکەیەوە بە ناوی “یاوەر ساڵحی” کوڕی ئەسکەندەر ، خەڵکی ئاوایی “لۆرابی” بە تێزاب هێرشی کراوەتە سەر هێرشەکە دوای دەمەقاڵەی خێزانی و لەبەردەم منداڵە ٨ ساڵانەکەیاندا ڕوویداوە .
بە پێی ئەم ڕاپۆرتە ؛ نزیکەی کاتژمێر ٨ی بەیانی تۆمەتبار ژن و منداڵەکەی دەباتە دەرەوەی شار و تێزاب بەسەر دەم و مل و سەر و دەستەکانی هاوسەرەکەیدا دەکات .
لە ئەنجامدا ئەو ژنە لاوە دووچاری توشی سوتاوی سەخت بووە و چاوێکی بینایی لە دەستداوە و لە ئێستادا لە نەخۆشخانەی گۆڵستانی کرماشان خەوێندراوە و باری تەندروستی ناجێگیرە .
سەرەڕای تێپەڕبوونی زیاتر لە 10 ڕۆژ بەسەر ڕووداوەکەدا وێڕای ئەوەی خێزانی قوربانییەکە سکاڵایەکی فەرمییان تۆمارکردووە هیچ ڕێوشوێنێکی دادوەری یان جێبەجێکردنی یاسای کاریگەر بۆ دەستگیرکردن یان لێکۆڵینەوە لە تۆمەتبارەکە نەگیراوەتەبەر و هێرشبەرەکەش بەردەوامە لە سووڕانەوە بە ئازادی لە سەرانسەری شارەکەدا.
ئەم پێشێلکارییە ئاشکرایە لە پرەنسیپی بێلایەنی قەزایی و سەربەخۆیی ، لەگەڵ نەبوونی پشتیوانی کاریگەر لە قوربانیانی توندوتیژی ، کەلێنێکی قووڵ لە سیستەمی لێپرسینەوەی تاوانکاری کۆماری ئیسلامی ئێران لە مامەڵەکردن لەگەڵ توندوتیژی دژی ژنان نیشان دەدات.
هێرش بە تێزاب بە جۆرێک لە ئەشکەنجەدان و مامەڵەی نامرۆڤانە دادەنرێت کە بە مەبەستی زیانگەیاندنی جەستەیی و دەروونی بە قوربانییەکە ئەنجام دەدرێت. ڕێگرینەکردن و سزانەدانی حکومەت لەم جۆرە کارانە ، پێشێلکردنی ئەرکەکانییەتی بۆ زامنکردنی مافە مرۆییەکانی ژنان و منداڵان.
جگە لەوەش بوونی منداڵێکی بچووک لە دیمەنێکی توندوتیژیدا لێکەوتەی دەروونی توندی دەبێت بۆی کە ئەمەش بۆ خۆی پێشێلکردنی مافەکانی منداڵە بەپێی ڕێککەوتننامەی مافەکانی منداڵ (CRC).