بە پێی زانیاریەکانی هانا مامۆستا لوقمان ئەمینی، ئیمام جومعەی مزگەوتی جامعی چوار یاری نەبی سنە ولە مامۆستایانی خۆشناو بە تۆمەتی”بێڕێزی بە پیرۆزیەکان” لە لایەن دادگای تایبەتی مامۆستایانی تارانەوە بە سێ ساڵ ومانگێک زیندانی تەعزیری و سەندنەوەی هەتا هەتایی جلو بەرگی مامۆستایەتی سزا دراوە،ئەم سزایە لە ڕۆژانی ڕابردوودا بەم مامۆستا ئاێینیە ڕاگەیەندراوە.
مامۆستا ئەمینی پێشتر لە مانگی ڕێبەندانی ۱٤۰۱، بە هۆی پشتیوانی لە بزووتنەوەی شۆڕشی ژن،ژیان،ئازادی لە جاددەی مەریوان لە لایەن هێزە ئەمنییەکانەوە ڕفێندرابوو. ئەو دوای تێپەڕاندنی بارودۆخێکی سەخت لە ژێر چاودێری هێزە ئەمنییەکان لە ڕێکەوتی ٣ی ڕەشەمەی ۱۱٤۰، بە دانانی بارمتە تا کۆتایی قۆناخەکانی دادڕسی ئازاد کرابوو.
رێکخراوی مافی مرۆڤی هانا وێڕای مەحکوم کردنی سزا دەرکراوەکان لە لایەن دادگای تایبەتی مامۆستایانی ئایینی تاران ڕایدەگەینێت، بە پشت بەستن بە پرەنسیپ و بناغەکانی چوار مەکتەبی فیکری سوننە، هەر چاوەدێرییەکی داهێنەرانە لە لایەن دادگای ڕۆحانیی شیعەوە بەسەر زانایانی شافەعیدا، ناشەرعی و نایاساییە. لە پرەنسیپە بنچینەییەکانی چوار مەکتەبی فیکری سوننە و هەروەها قوتابخانەی شافیعیدا هیچ پێشینەیەک بۆ هیچ چاوەدێرییەکی قەزایی لە سەر ڕەفتار و کاروباری کەسیی پیاوانی ئایینی نییە و ئەمەش داهێنانێکی دادوەری- فیقهیی سیستەمی یاسایی کۆماری ئیسلامی ئێرانە.
شایانی باسە لەسەر ئەو بنەمایە مامۆستایانی شافعی کورد، ئازادی و ئیختیاریان هەیە سەبارەت بە جلوبەرگەکانیان و هیچ “ڕێسایەکی تایبەت بە پۆشینی جلوبەرگی قوتابیانی مەدرەسەکان”یان بەسەردا نایەت و هەر بۆیە سزایەک کە پێی دەوترێت “لێسەندنەوەی جلوبەرگ” هیچ بنەما و بایەخێکی نییە. ڕێکخراوی مافی مرۆڤی هانا وێڕای پشتیوانی لە مامۆستا لوقمان ئەمینی، داوا لە هەموو مامۆستایان و پیاوماقوڵانی سوننە مەزەب دەکات، بەشێوەیەکی شیاو وەڵامی ئەم بێڕێزیە بە مامۆستایانی کورد و زەوتکردنی ئازادی ئایینییان بدەنەوە.