بە پێی ڕاپۆرتی گەیشتوو بە رێکخراوی مافی مرۆڤی هانا : بنیامین رەحیم پور ، تەمەن ٣٣ ساڵ ، کوڕی موسا ، خێزاندار و خاوەن منداڵ ، خەڵکی ئاوایی “ئەوێهەنگ”ی سەر بە شاری سنە و دانیشتووی ئەم شارە ، ڕۆژی یەکشەممە ٢٢ی پوشپەڕی ١٤٠٤، دوای بانگ کرانی لقی چواری جێبەجێ کاری ئەحکامی کەیفەری سنە بە مەبەستی جێبەجێ کرانی سزاکەی بۆ زیندانی سنە ڕاگوێزرا .
ئەو پێشتر لە لایەن لقی یەکی دادگای شۆڕشی ئەم شارە بە تۆمەتی “پڕوپاگەندە لە دژی نیزام” بە ساڵ زیندانی تەعزیری مەحکوم کرابوو . کۆبوونەوەی پێڕاگەیشتن بە تۆمەتەکانی سەری لە رێکەوتی ٢٢ی ڕێبەندانی ١٤٠٣، بەڕێوەچوو و سزای دەرچوو لە رێکەوتی ٢٦ی ڕێبەندانی هەمان ساڵ ، پێی ڕاگەیندرا .
بنیامین رەحیم پور لە رێکەوتی ٢ی ڕێبەندانی ١٤٠٣، بە هەڵکوتانە سەر دوکانەکەی لە سنە بە شێوەی توندوتیژانە لە لایەن هێزە ئەمنییەکانەوە دەستبەسەر کرا و بۆ گرتنگەی ئیتڵاعاتی سوپای شەهرامفەری سنە ڕاگوێزرا . دواتر هێزە ئەمنییەکان هەڵیانکوتایە سەر ماڵەکەی و بە بەکارهێنانی توندوتیژی ، دەستیان گرت بە سەر مۆبایل و لەبتۆپەکەی ئەودا .
ناوبراو ماوەی ١٩ ڕۆژ لە گرتنگەی ئیتڵاعاتی سوپا بەبێ مافی دەستڕاگەیشتن بە پارێزەر و پەیوەندی و چاوپێکەوتن لەگەڵ بنەماڵەی لە ژێر لێپرسینەوەدا ڕاگیرا .
لە رێکەوتی ١٢ی ڕێبەندانی ١٤٠٣، بنەماڵەکەی لە ئەنجامی بە دواداچوونیان بۆ ئاگادار بوون لە دۆخ و چارەنوسی ئەو ڕووبەڕووی هەڕەشە و دەستبەسەردا گرتنی مۆبایلەکانیان بوونەوە . ئەو لە رێکەوتی ٢٠ی ڕێبەندانی هەمان ساڵ بە دانانی بارمتەی ٥٠٠ ملوێن تمەنی و دانانی تاپۆی دوکان بە شێوەی کاتی ئازاد کرا .
ئەم شارۆمەندە کوردە پێشتریش لە ١٤ی گوڵانی ١٣٩٩ لەگەڵ براکەی بە ناوی تارق ، دەستبەسەر کرابوو .
تارق رەحیم پور لە ٩ی گەلاوێژی ١٣٩٩، لە لایەن لقی یەکی دادگای شۆڕشی سنە بە سەرۆکایەتی قازی سەعیدی ، بە تۆمەتی “هاوکاری لەگەڵ حزبێکی کوردستانی ئۆپۆزۆسیۆنی حکومەتی ئێران” بە چوار ساڵ زیندانی تەعلیقی و لە سەر سکاڵای سوپای پاسداران تۆمەتی “بێڕێزیکردن بە حکومەت و هێزەکان” بە ساڵێک زیندانی تەعزیری مەحکوم کرابوو .