بە پێی ئەو ڕاپۆرتانەی کە بە رێکخراوی مافی مرۆڤی هانا گەیشتووە : ڕۆژی سێشەممە ١٧ی پوشپەڕی ١٤٠٤، سزای لێدانی٤٠ زەربە قامچی ئارمان شادیوەند گۆرانیبێژ و ئاوازدانەری کورد ، خەڵکی دەرەشاری سەر بە پارێزگای ئیلام ، بە تۆمەتی بێڕێزی بە ئیبراهیم رەئیسی جێبەجێ کراوە .
ئەم حوکمە لە لقی جێبەجێکاری ئەحکامی دادسەرای شاری دەرەشار جێبەجێ کراوە .
ئەم هونەرمەندە پێشتر لە رێککەوتی ٢٧ی ڕەشەمەی ١٤٠٤، لە لایەن لقی ١٠١ی دادگای کەیفەری دووی شاری دەرەشار بە سەرۆکایەتی قازی ئەیوب عەلی جانی ، بە تۆمەتی “بێڕێزی بە سەرۆککۆمار سزای لێدانی ٣٠ قامچی بە سەردا سەپێندرابوو ، هەر لەم دۆسیەدا ناوبراو تۆمەتی “بێڕێزی بە سەرۆکی حیزبوڵڵای لوبنانی لە سەر لابرابوو .
ئەم هونەرمەندە کوردە جگە لەم حوکمە ، دۆسیەی دیکەشی لە دادگای شۆڕشی دەرەشار هەبوو ، ئەو لە مانگی خەزەڵوەری ١٤٠٣ ، بە تۆمەتی “بێڕێزی بە ڕێبەر و پڕوپاگەندە لە دژی حکومەت” بانگ کرا و دوای ڕونکردنەوەی تۆمەتەکانی ، بە دانانی بارمتە ئازاد کرابد .
کۆبوونەوەی پێراگەیشتن بەم تۆمەتانە لە رێکەوتی ٣٠ بەفرانباری ١٤٠٣، لە لقی دووی دادگای شۆڕشی ئیلام بە سەرۆکایەتی قازی “داریوش پیری” بەڕێوەچوو .
دوای دەرچوونی حوکمەکە ، ئارمان شادیوەند داوای پێداچوونەوەی کرد بەڵام لە نیهایەتدا ئەم حوکمە لە ٢٩ی گوڵانی ١٤٠٤، لە لایەن لقێ نۆیەمی دادگای تێهەڵچوونەوەی ئیلام بە سەرۆکایەتی دادوەران “تالب دێهگۆنبەدی و عەلی ئەسغەر شەریفی” پشتڕاست کرایەوە . بە پێی بڕیارەکە ئەو بە تۆمەتی بێڕێزی بە ڕێبەر سزای ١٦ مانگ زیندانی تەعزیری و بە تۆمەتی پڕوپاگەندە لە دژی نیزام سزای ٨ مانگ زیندانی تەعزیری بە سەردا سەپاوە .
ئارمان شادیوەند لە ساڵانی ڕابردوودا بە هۆکاری چالاکیە هونەری و بەرهەمە ڕەخنەگرانەکانی گوشاری ئەمنی و دادوەری خراوەتە سەر ، جێبەجێ کرانی سزای قامچی و سزای زیندانیکردنی ئەو ، نمونەی سەرکوتی سیتماتیکی هونەرمەندانی ڕەخنەگر و سنووردار کردنی ئازادی ڕادەربڕینە لە ئێران .