ئەنجوومەنی مافی مرۆڤی ڕێکخراوی نەتەوە یەکگرتووەکان لە دانیشتنێکی نائاسایی ڕۆژی ٣ی ڕێبەندانی ١٤٠٤ (٢٣ی ژانویەی ٢٠٢٦)، باسی لە دۆخی ناڕەزایەتی ناڕازییان لە ئێران و تاوانکارییەکانی کۆماری ئیسلامی کرد.
دوابەدوای وتارەکانی نوێنەرانی حکومەتەکان و بەشێک لە ڕێکخراوەکانی مافی مرۆڤ سەبارەت بە تاوانکارییەکانی کۆماری ئیسلامی لە کاتی ناڕەزایەتییەکان و کوشتنی هەزاران کەسی ناڕازی، بە ٢٥ دەنگی بەڵێ، ١٤ دەنگی بێ لایەن و ٧ دەنگی نەخێر، بڕیارنامەی ئیدانەکردن پەسەند کرا. بەم پێیە سەرکوتکردنی توندوتیژانە و نامرۆڤانەی ناڕەزایەتییەکانی ئەم دواییە لەلایەن هێزەکانی حکومەتەوە بە توندی شەرمەزار کرا.
ڕاپۆرتدەرانی تایبەتی نەتەوە یەکگرتووەکان لەم کۆبوونەوەیەدا، بە پێشکەشکردنی بەڵگەنامەی بەکارهێنانی “چەکی شەڕ لە دژی خۆپیشاندەران” و ڕێژەی زۆری کوژراو و دەستگیرکردن، ئەم ڕووداوانەیان بە یەکێک لە “کوشندەترین سەرکوتەکان لە مێژووی نوێدا” وەسفکرد.
بەپێی بڕیارنامە پەسەندکراوەکە، ئەرکی “کومیتەی ڕاستی دۆز”ی نەتەوە یەکگرتووەکان بۆ ماوەی دوو ساڵی دیکە درێژکرایەوە بۆ کۆکردنەوە و بەڵگەنامەکردنی بەڵگەی پێشێلکارییەکانی مافی مرۆڤ و ئەگەری تاوانەکانی دژ بە مرۆڤایەتی بۆ بەکارهێنانی لە دادگا نێودەوڵەتیەکان و تاوانەکانی داهاتوو.
شایانی باسە کە غەزال موهتەدی بە نوێنەرایەتی ڕێکخراوی مافی مرۆڤی هانا بەشداری لەم کۆبوونەوەیەدا کرد و ڕاپۆرتی پێشکەش بە ڕاپۆرتدەرانی تایبەتی ئەنجومەنی مافی مرۆڤ کرد.
ڕێکخراوی مافی مرۆڤی هانا وێڕای دەربڕینی هاوسۆزی دووبارە بۆ بنەماڵەی قوربانییەکان، هەموو هەوڵێک دەدات بۆ بەڵگەنامە کردنی تاوانەکان و پەیوەندی کاریگەرانە لەگەڵ ڕێکخراوەکانی مافی مرۆڤ و پەیڕەوکردنی میکانیزمی یاسایی بۆ چاودێریکردنی پێشێلکارییە گەورەکانی مافی مرۆڤ لەلایەن کۆماری ئیسلامییەوە.
