رێکخراوی مافی مرۆڤی هانا زانیویەتی، ڕۆژی پێنجشەممە ١٨ی بەفرانباری ١٤٠٤، شارۆمەندێک بە ناوی ئیبراهیم شەهبازیان، خەڵکی قوروە و دانیشتووی تاران کە بێسەروشوێن بوو، تەرمەکەی دوای دوو ڕۆژ لە پزیشکی دادوەری کەهریزەک دوزراوەتەوە.
بە گوێرەی زانیاریەکانی هانا، ئاسەواری فیشەک لە سەر جەستە و سەری ئەودا هەبووە، پێدەچێت پێش مەرگ یا دوای مەرگی بە چەکی سەرد لێدرابێت.
بە گوتەی سەرچاوەیەکی ئاگادار، بۆ وەرگرتنی تەرمی ئیبراهیم شەهبازیان بڕی ٣٠٠ ملیۆن تمەن لە بنەماڵەکەی وەرگیراوە و ڕێورەسمی ئەسپەردەکردنەکەی لە ژێر کۆنتڕۆڵ و چاوەدێری چڕی ئەمنیدا بەڕێوەچووە.
دامودەزگا ئەمنییەکان بە گوشار و هەڕەشە بنەماڵەکەیان ناچار کردووە سیناریۆی درووستکراوی پەیوەندی لەگەڵ موساد قەبوڵ بکەن. لەم ڕێرەوەدا هاوسەرەکەی ناچار کراووە چاوپێکەوتنێکی تەلەفیزیۆنی لە ژێر ناوی هاوکاری لەگەڵ موساد ئەنجام بدات.