ناوەندی ئاماری رێکخراوی مافی مرۆڤی هانا ڕاپۆرتی مانگانەی خۆیی لە سەر دۆخی مافی مرۆڤ لە کوردستان بڵاو دەکاتەوە .
ئەو ئامار و زانیاریانەی لەم ڕاپۆرتەدا هاتووە ، لە ڕێگەی لێکۆڵینەوەی مەیدانی لە قوربانییەکان ، خێزانەکانیان و بەڵگەنامە کۆکراوەکان و دواتر لە ڕێگەی سەرچاوە سەربەخۆکانەوە پشتڕاستکراونەتەوە. بۆیە ڕاپۆرتەکە تەنها ئەو حاڵەتانە دەگرێتەوە کە هانا توانیویەتی بە دڵنیاییەوە دروستی زانیارییەکان پشتڕاست و بڵاویان بکاتەوە .
بە پێی زانیاریە کۆکراوەکان ، زۆربەی پێشێلکاری مافی مرۆڤیەکان لە بەشەکانی مافی مەدەنی و سیاسی و بە تایبەتی لە بواری ئازادی کەسەکان ، قەدەغەی دەستبەسەر کردنی خۆسەرانە و مافی ژیان ڕوویانداوە ، سەبارەت بە دەستبەسەر کردنی خۆسەرانە ، هانا ٥٤ حاڵەتی دەستبەسەر کردنی خۆسەرانەی شارۆمەندانی کوردی لە ناوچە جیاجیاکانی کوردستان لە لایەن دامەزراوە ئەمنییەتیەکانی کۆماری ئیسلامی تۆمار کردووە .
بە پێی لێکۆڵینەوەکانی هانا ، زۆربەی دەستبەسەر کردنەکان بە شێوەی خۆسەرانە و بەبێ بانگ کردنی پێشوەختە و بڕیاری دادوەر ئەنجام دراوە . زۆربەی دەستبەسەر کردنەکان لە پەیوەندی لەگەڵ هاوکاری لەگەڵ حزبە کوردیەکانی ئۆپۆزۆسیۆن ، چالاکی ژینگە پارێزی ، مافی ژنان ، چالاکی مەدەنی و چالاکیە میدیاییەکان بووە . لە نێو دەستبەسەر کراواندا ٩ کەسی ژن و ٣ کەسی مامۆستای ئایینی هەیە .
سەبارەت بە مافی ژیان و لە سێدارەدان ، لانیکەم ٢٢ شارۆمەندی کورد لە زیندانەکانی ئێران لە سێدارە دراون . لە نێوان کەسانی لە سێدارەدراودا ١٣ کەس بە تۆمەتی کوشتنی بە ئانقەست و ٩ کەسیش بە تۆمەتی تاوانەکانی پەیوەست بە مادەهۆشبەرەکان لە سێدارە دراون . بە پێی ڕاپۆرتی هانا ئاماری سێدارە لە مانگی مەی بە نسبەت مانگی ئاوریل ١٧٥ لە سەد زیادی کردووە .
دادوەرەکانی ئینقلاب لەم مانگەدا ، لە کۆی گشتیدا بۆ ١٤ کەس ، سزای ٤٤٢ مانگ زیندانیان دەرکردووە کە سەرجەمی سزا دەرچووەکان جێبەجێ کراون .
مانگی مەی شاهیدی کوشتنی بە دەر لە یاسای کۆڵبەران و کاسبکاران لە لایەن هێزەکانی پاسەوانی سنوور و هێزە ئەمنییەکانی کۆماری ئیسلامی بووە . بەم پێیە لانیکەم ٦ کۆڵبەر و کاسبکار کوژراو یا بریندار بوون . لەم ژمارە کەسە ، ٣ کەس بە تەقەی ڕاستەوخۆی هێزە ئەمنییەکان کوژراون و ٣ کەسیش بریندار بوون و کۆڵبەرێکیش دەستبەسەر کراوە بە پێنج ساڵ زیندان سزا دراوە .
خۆکوشتن :
لانیکەم ١٣ کەس پێکهاتوو لە ٢ ژن و ١١ پیاو ، بە هۆی هەژاری و بێکاری لە شارەکان و ئاواییەکانی کوردستان خۆیان کوشتووە کە بە نسبەت مانگی ڕابردوو ٤٥ لەسەد زیادی کردووە .
ڕاپۆرتی مانگانەی هانا هەروەها دەرخەری بەردەوامی توندوتیژی ناموسی و ژن کوشتنە لە شارەکانی کوردستان . لە مانگی ڕابردوو ٦ ژن لە لایەن پیاوانی بنەماڵە وەک هاوسەر ، باوکی یا برای خۆیان بە هۆکاری خێزانی و زۆرتر لە چوارچێوەی ئەوەی پێی دەگوترێت هاندەری ناموسی کوژراون و ٢ پیاویش هەر لەم پەیوەندیەدا کوژراون .
ڕووداوی کاریش کە زۆرترین هۆکاری نەبوونی ئەمنییەتی شوێنی کار و ستانداردە پشتڕاست کراوەکانی رێکخراوی جیهانی کارە ، بووەتە هۆی کوژرانی لانیکەم ٥ کرێکار لە شوێنی کارەکانیان .
تەقینەوەی مین :
لە مانگی مەی دوو کەس بە هۆی تەقینەوەی مین کوژراو یەک کەسیش بریندار بووە . کوژراو و بریندارەکانی ئەم مانگە سەرجەمیان سەرباز و لە هێزە چەکدارەکانی حکومەت بوون .
هەڵسەنگاندنی مانگانەی هانا :
هانا باوەڕی وایە کە کۆماری ئیسلامی بە زۆر کردنی جێبەجێ کردنی سزای سێدارە لە کاتێکدا هەم لە بواری ناوخۆیی و هەمیش لە سیاسەتی دەرەکی لە قەیراندایە ، بەتەمای ترساندنی خەڵک و ڕێگریکردنە لە دەستپێکرانی ناڕەزایەتیە بەربڵاوەکان لە سەراسەری ئێران .
ناوەندی ئاماری رێکخراوی مافی مرۆڤی هانا
ژوەنی ٢٠٢٥
بە کار هێنانی ئەم ئامارە بە مەرجی ئاماژەدان بە سەرچاوەکە ڕێگە پێدراوە .