ناڕەزایەتی و مانگرتنەکانی ئێران تا ڕۆژی حەوتەم (١٣ی بەفرانبار) بەردەوام بووە و بە پێی زانیارییە بەردەستەکان، پانتاییان لە ڕووی جوگرافیاوە فراوان و لە ڕووی کۆمەڵایەتییەوە هەمەچەشنە ماوەتەوە؛ لە هەمان کاتدا بوونی هێزە ئەمنییەکان لە زۆرێک لە شارەکاندا زیادی کردووە و پێکدادانەکان چڕتر بووەتەوە. لەم ماوەیەدا دوو ڕەوتی نیگەرانکەر لە ڕووی ستانداردەکانی مافی مرۆڤەوە بوونیان هەیە. یەکەم: زیادبوونی بەرچاوی دەستبەسەر کردنەکان بەتایبەتی مێرمنداڵان و کەسانی خوار تەمەنی ١٨ ساڵ؛ و دووەم: بڵاوکردنەوەی ئەو گرتە ڤیدیۆییانەی کە سەرچاوە جۆراوجۆرەکانی مافی مرۆڤ بە “دانپێدانانی زۆرەملێ” وەسفیان کردووە.
بە پشتبەستن بە لێکۆڵینەوە و سەرچاوە گشتییەکان و ڕاپۆرتە مەیدانییەکان، لە ماوەی حەوت ڕۆژی یەکەمدا لە لانیکەم ١٧٤ شوێن لە ٦٠ شار لە سەرانسەری ٢٥ پارێزگادا ناڕەزایەتی یان مانگرتن بینراوە. لانیکەم ٥٨٢ کەس دەستبەسەر کراون. هەر لەو ماوەیەدا لانیکەم ١٥ هاووڵاتیی ناڕازی گیانیان لەدەست داوە، بەمەش کۆی گشتیی گیانلەدەستدان کە لانیکەم ئەندامێکی هێزە ئەمنییەکانی تێدایە، گەیشتە ١٦ کەس، هەروەها ڕاپۆرتەکان ئاماژە بەوە دەکەن کە ناڕەزایەتی خوێندکاران بەردەوامە. چالاکیی ناڕەزایەتی لە ١٨ زانکۆدا ڕاگەیەندرا و بە گشتی ١٨ کۆبوونەوەی خوێندکاران لە ١٥ زانکۆدا لە ئامارە حەوت ڕۆژەکەدا تۆمارکرا.
ڕاپۆرت و ڤیدیۆی پشتڕاستکراوەی ژینگەیەکی قورسی ئەمنی و دەستگیرکردنی توندوتیژانە لە شوێنە گشتییەکان و بەکارهێنانی ئامرازی توندوتیژی کۆنترۆڵکردنی قەرەباڵغی وەک گازی فرمێسکڕێژ و لە هەندێک شوێندا ڕاپۆرتی بەکارهێنانی چەکی سەربازی هەیە. هەروەها بەپێی لێکۆڵینەوەکانی هانا، هەندێک لە بریندارەکان لە ترسی دەستبەسەرکران ڕەتیانکردووەتەوە بچنە نەخۆشخانەکان.ئەمەش هەم مەترسییەکانی پاراستن زیاد دەکات و هەم پشتڕاستکردنەوەی ژمارەی بریندارەکان قورستر دەکات. هەروەها باسی ناکۆک هەیە سەبارەت بە هۆکاری مردن و ژمارەی ئەو مردنانەی کە لەنێو بریندارەکاندا ڕاپۆرتکراون.
سەبارەت بە دەستبەسەرکردن، جگە لە زیادبوونی ژمارەی دەستبەسەرەکان، هەواڵی گواستنەوەی دەستبەسەرکراوان لە هەندێک بەندیخانەدا هەبووە، لەوانە ڕاپۆرتی تەرخانکردنی بەش لە زیندانی ناوەندی کەرەج بۆ ڕاگرتنی گیراوانی پەیوەندیدار بە ناڕەزایەتییەکان، هەروەها ڕاپۆرتی گواستنەوەی نزیکەی ٢٠٠ کەس بۆ زیندانی قوم.
لەم جۆرە هەلومەرجەدا نیگەرانی لە نەبوونی دادگاییکردنێکی دادپەروەرانە و نادڵنیایی شوێنی دەستبەسەرکردن و نەبوونی زانیاری ڕوون سەبارەت بە تۆمەتەکان و ناڕوونی دەستڕاگەیشتن بە پارێزەران و پەیوەندی لەگەڵ خێزانەکاندا هەیە، بەتایبەتی لەو کەیسانەی کە کەسانی خوار تەمەنی ١٨ ساڵیان تێدایە.
هانا لە ڕاپۆرتەکانی داهاتوودا ئاماری متمانەپێکراو لەسەر ژمارەی دەستگیرکراوەکان و بریندارەکان و کوژراوەکان دەخاتە ڕوو، لە هەمان کاتدا بە وردی پشکنینیان بۆ دەکات، جەخت لەسەر پشتڕاستکردنەوەی سەرجەم کەیسەکان دەکاتەوە.