ڕێکخراوی مافی مرۆڤی هانا بە پشتبەستن بەو ڕاپۆرتانەی لە سەرچاوە سەربەخۆکانەوە وەرگیراون، لەوانە ڕاپۆرتێک کە لە لایەن کۆمەڵەی خوێندکارانی کۆمەڵناسی زانکۆی تەربیەت مودەڕس بڵاوکراوەتەوە، نیگەرانی قووڵی خۆی لە هەڵگرتنی تەرمی ٥٠ ژنە خۆپیشاندەرانی تارانی بە شێوەی “نەناسراو” لە ناوەندی کەهریزەک دەردەبڕێت.
بەگوێرەی ئەو زانیارییانەی لەو سەرچاوانە خراونەتەڕوو، ئەو تەرمانە هی ئەو ژنانەن کە لە کاتی ناڕەزایەتییەکاندا گیانیان لەدەستداوە. بەڵام تا ئێستا بە فەرمی ناسنامەیان پشتڕاست نەکراوەتەوە و پڕۆسەی ڕادەستکردنی تەرمەکانیان بە بنەماڵەکانیان تەواو نەبووە.
بەردەوامی “نەناسراو” مانەوەی ئەم قوربانیانە نیگەرانی جددی لەبارەی شەفافیەتی ڕاپۆرتکردن و شێوازی مامەڵەکردن لەگەڵ ئەم کەیسانەدا دروست دەکات. بەپێی پابەندبوونە مافی مرۆڤیەکان، دەوڵەتان دەبێ ژیانی تاکەکان بپارێزن و بەپەلە و بێلایەنانە لێکۆڵینەوە لە مردنە گوماناوییەکان بکەن.
خێزانەکان مافی خۆیانە بزانن چی بەسەر ئازیزەکانیاندا هاتووە، هەروەها دەبێت ناسنامەی گیانبەختکردووەکان بە فەرمی دیاری بکرێت. دواکەوتنی ناڕەوا لە ڕادەست کردنی تەرمەکان یان لە پێدانی زانیاریدا لەگەڵ بنەماکانی کەرامەتی مرۆیی و شەفافیەتدا ناگونجێت.
ڕێکخراوی مافی مرۆڤی هانا داوا لە لایەنە پەیوەندیدارەکان دەکات کە لێکۆڵینەوەی دەستبەجێ و سەربەخۆ و شەفاف لە ناسنامەی ئەو کەسانە و چۆنیەتی گیان لەدەستدانیان دەستپێبکەن، بۆ ئەوەی بتوانرێت ناساندن و گەڕاندنەوەی تەرمەکان بۆ کەسوکارەکانیان بەبێ دواکەوتن ئەنجام بدرێت، بە ئاشکرا دەرئەنجامی لێکۆڵینەوەکان بڵاوبکرێتەوە و لێپرسینەوەیەکی کاریگەر مسۆگەر بکرێت، هەروەها خۆیان لە هەر کارێک یان سیاسەتێک کە ببێتە هۆی شاردنەوەی زانیاری یان بێبەش کردنی خێزانەکان بۆ دەستڕاگەیشتن بە ڕاستییەکان بەدوور بگرن.