ئێمە ڕێکخراوە ناحکومی و گرووپە کۆمەڵایەتییەکان لە کۆمەڵگای ئێرانیانی دەرەوەی وڵات ، بە ڕێزەوە داوا لە وڵاتانی ئەندامی ئەنجومەنی مافی مرۆڤی ڕێکخراوی نەتەوە یەکگرتووەکان دەکەین کە ئەرکەکانی “کۆمیسیۆنی سەربەخۆی نێونەتەوەیی دۆزینەوەی ڕاستییەکان سەبارەت بە کۆماری ئیسلامی ئێران” و “ڕاپۆرتەری تایبەت سەبارەت بە دۆخی مافی مرۆڤ لە ئێران” درێژ و فراوانتر بکەن .
بەم داواکاریە ، ئێمە پشتیوانی لەو ڕاسپاردانە دەکەین کە لەلایەن کۆمەڵگەی مەدەنی و شارەزایانی یاسایی و داکۆکیکارانی مافی مرۆڤی ئێرانەوە لە کۆبوونەوەکانی ئەنجومەنی مافی مرۆڤ لە مارسی ٢٠٢٥ پێشکەش کران .ڕاپۆرتی ساڵی ٢٠٢٥ی کۆمیتەی دۆزینەوەی ڕاستییەکان بە ئاماژەدان بە زیاتر لە ٣٨ هەزار بەڵگەنامە، بەردەوامیی کولتووری بێ سزایی لە ئێران پشتڕاست دەکاتەوە .
ڕاپۆرتەکە ئاماژە بە پێشێلکارییە بەربڵاوەکانی مافی مرۆڤ دەکات ، لەوانە لەسێدارەدانی نایاسایی ، ئەشکەنجەدان ، دادگاییکردنی نادادپەروەرانە و سەرکوتکردنی ئازادییە بنەڕەتییەکان. ژنان، منداڵان، کەمینەکان و نەیارانی سیاسی زۆرترین زیانیان بەرکەوتووە، تەنها لە ساڵی ٢٠٢٣دا زیاتر لە ٩٠٠ حاڵەتی لەسێدارەدان تۆمارکراوە .بە لەبەرچاوگرتنی توندی ئەم دۆزینەوانە ، ئێمە داوا لە ئەنجومەنی مافی مرۆڤ دەکەین کە ئەرکی لیژنەی دۆزینەوەی ڕاستییەکان بە مەودایەکی فراوانتر درێژ بکاتەوە .
ئەو سنووردارکردنە کاتییەی ئێستا کە لێکۆڵینەوەکانی کۆمیسیۆن سنووردار دەکات بۆ ڕووداوەکانی دوای ٢٥ی خەرمانانی١٤٠١ (١٦ی سێپتامبری ٢٠٢٢)، بەربەستێکە لەبەردەم تێگەیشتنێکی تەواو لە شێوازە بەردەوام و سیستماتیکییەکانی پێشێلکردنی مافەکانی مرۆڤ .بۆیە داوا لە ئەنجومەن دەکەین ئەم سنووردارکردنە لاببات بۆ ئەوەی لێکۆڵینەوەی گشتگیرتر ئەنجام بدرێت . فراوانکردنی ئەو ماوەیە بۆ لێکۆڵینەوەی وردتر لە پێشێلکارییە بەردەوامە بەڵگە دارەکان ، لەوانە ناڕەزایەتییەکانی خەزەڵوەری ١٣٩٨، بزووتنەوەی سەوزی ١٣٩٨ و قۆناغەکانی پێشوودا یارمەتیدەر دەبێت .
جگە لەوەش ، لە کاتێکدا کە گرنگیدان بە ژنان و منداڵان زۆر گرنگە ، ئێمە هانی ئەنجومەن دەدەین کە مەودای بابەتیی لێکۆڵینەوەکە فراوانتر بکات بۆ ئەوەی پێشێلکارییە سیستماتیکییەکانی دیکەی مافەکانی مرۆڤ ، لەوانەش لەسێدارەدانی حکومەتی ، سەرکوتی بێسنوور و توندوتیژی لەسەر بنەمای جێندەری بگرێتەوە . ئەم پێشێلکارییە پێکهاتەییانە پێویستیان بە لێکۆڵینەوەی سەربەخۆ و بەردەوام و لێپرسینەوەی نێودەوڵەتی هەیە .ئێمە هەروەها داوا لە ئەنجومەن دەکەین که ئەرکەکانی ڕاپۆرتێری تایبەت له بارەی ڕەوشی مافەکانی مرۆڤ له کۆماری ئیسلامی ئێران ، درێژ بکاتەوه .
ئەم ئەرکە بەردەوامە لە ڕۆڵی سەرەکی لە بەڵگەنامەکردنی پێشێلکارییەکانی مافی مرۆڤ، پەیوەندی لەگەڵ قوربانیان و کۆمەڵگەی مەدەنی و ڕاکێشانی سەرنجی نێودەوڵەتی بۆ دۆخی ئێران . داوا لە وڵاتانی ئەندام دەکەین پشتگیری لەم ئەرکە بکەن و سەرچاوەی پێویستی بۆ دابین بکەن ، لەوانەش لە ڕێگەی هەماهەنگی لەگەڵ میکانیزمەکانی دیکەی وەک کۆمیسیۆنی دۆزینەوەی ڕاستیەکان .ئێمە پابەندین بە پشتیوانیکردن لە هەوڵە نێودەوڵەتییەکان بۆ بەرگریکردن لە مافەکانی مرۆڤ و لێپرسینەوە لە ئێران .
درێژکردنەوە و فراوانکردنی هەردوو ئەرکەکە ، هاوتەریب لەگەڵ ئەو ڕاسپاردانەی کە لە کۆبوونەوەکانی ئەنجومەنی مافی مرۆڤ لە مارسی ٢٠٢٥دا خراونەتەڕوو ، هەنگاوێکی گرنگ دەبێت بۆ کۆتاییهێنان بە بێ سزایی و بەدەستهێنانی دادپەروەری بۆ قوربانییەکان .