رێکخراوی مافی مرۆڤی هانا بە دەربڕینی بە داخەوە بوونی ڕایدەگەینێت کە لە دانیشتنی ئەم دواییانەی فرۆمی بابەتەکانی کەمینەکان لە ئەنجومەنی مافی مرۆڤی نەتەوەیەکگرتووەکان چەندین نوێنەری پەرلەمانی کۆماری ئیسلامی ئێران وەک نوێنەری کوردەکان و بەلوچەکان ناسێندراون و وتاریان پێشکەش کردووە. لە نێو ئەم نوێنەرانەدا کەماڵ حوسێن پور نوێنەری حکومەتی سەردەشت و پیرانشارە کە خۆیی وەک نوێنەری کوردەکان ناساندووە و وتاری پێشکەش کردووە.
ئەم ڕێبازەی ئەنجوومەنی مافی مرۆڤی نەتەوە یەکگرتووەکان و گروپە کاریەکانی، بێبایەخکردن و لە بەرچاونەگرتنی ئاشکرای دامەزراوە سەربەخۆکانی مافی مرۆڤ و بێبایەخکردنی واقیعی سیاسی و کۆمەڵایەتی و پێشێلکاریی گەورەی مافەکانی مرۆڤە لە کوردستاندا.
ئێمە بە توندی ناڕەزایەتیمان دەربڕیوە و داوامان لە سکرتاریەتی ئەم مەکۆیە کردووە کە بە لەبەرچاوگرتنی بەڵگەنامەکانێ پێشێلکارییە گەورەکانی مافی مرۆڤ لە کوردستان، سەبارەت بە مۆڵەتی قسەکردنی نوێنەری پەرلەمانی کۆماری ئیسلامی، کە خۆی پێکهاتەیەکی ئەم سیستەمە دژە مافی مرۆڤەیە، ڕوونکردنەوەیەکی هۆکاردار و نووسراو پێشکەش بکات.
ڕێکخراوی مافی مرۆڤی هانا وێڕای ئیدانەکردنی ئەو مۆڵەتەی کە بە کەمال حوسێن پور دراوە بۆ قسەکردن لە دەزگای مافی مرۆڤی نەتەوە یەکگرتووەکان، جەخت لەوە دەکاتەوە کە بە پشتبەستن بە هیچ کام لە بنەما و پێوەرەکانی یاسایی سەبارەت بە هەڵبژاردنی ئازاد لە یاسای دەستووری و یاسای نێودەوڵەتیدا، ئەو کەسەی پێشتر ئاماژەی پێکراوە، بە نوێنەری شەرعی گەلی کورد نازانرێت و تەنیا نوێنەری حکومەتی کۆماری ئیسلامی ئێرانە.
هانا ئاماژە بەوە دەکات کە لە ئەدەبیاتی سیاسی کوردستاندا ئەم جۆرە تاکانە لەلایەن خەڵکەوە پێیان دەوترێت “جاش”. بەبێ گوێدانە مانای وشەیی جاش لە زمانی کوردیدا زاراوەیەکی سیاسییە کە لە ئەدەبدا بەکاردێت بۆ ئاماژەدان بە کەسێک کە دژی ئارمانە ئازادیخوازانەکانی گەلی کورد هاوکاری حکومەتی ناوەندی دەکات.
ڕێکخراوی مافی مرۆڤ هانا
٢٩ی نۆڤەمبەری ٢٠٢٥